O GRUPO MUNICIPAL SOCIALISTA DE TUI LEVARÁ A PLENO UNHA MOCIÓN ENCAMIÑADA A INICIAR OS TRÁMITES PARA A CREACIÓN EN TUI DA PRIMEIRA LONXA DE RÍO NO TRAMO INTERNACIONAL DO RÍO MIÑO

Atendendo á elevada taxa de paro que ten o noso municipio, consideramos que sería relevante iniciar os traballos e trámites necesarios para impulsar non só o desenvolvemento da actividade pesqueira no Miño, senón tamén incentivar todos aqueles aspectos que xiran entorno á pesca e á comercialización dos seus produtos, como mecanismos de creación de postos de traballo.

Ademais, o Grupo Municipal Socialista de Tui solicita que dende oConcello se defenda que sexa Tui o lugar elixido para a construción da primeira lonxa no Tramo Internacional do Río Miño, xa que o Plan de Xestión da angula esixe que ademais de que toda a angula pescada deberá quedar rexistrada nun diario, esta deberá pasar por lonxa co obxectivo de efectuar un control da súa captura e comercialización. Mentres non exista unha lonxa de río, as capturas deberanse levar á lonxa pesqueira da Garda, ou mediante a axeitada Guía de transporte, a un punto de venda, un centro de control ou unha lonxa móbil autorizada
.
O Grupo municipal Socialista de Tui considera que o noso municipio é o lugar idóneo para a súa ubicación e así debe facerse saber ás autoridades correspondentes e defender esta postura para seguir apostando polo desenvolvemento de actividades ligadas ao Miño en todas as súas vertentes, non só no aspecto deportivo.

É necesario como antano, volver impulsar a pesca de río como saída laboral, á vez que promover a comercialización destes produtos xa elaborados que estaría ligada ao prestixio da actividade hostaleira do noso municipio.

Recordar ademais que a Orde de 31 de marzo de 2014 pola que se regula a comercialización en orixe das especies eurihalinas de interese comercial, prohibe vender a particulares as devanditas especies para iso promoveuse a creación dos chamados "centros de recollida".

Dos 21 centros en principio autorizados Tui soamente ten 2, fronte a outros Concellos como o Rosal que ten 10, ou Tomiño que ten 5.

Enrique Cabaleiro González
Voceiro do Grupo Municipal Socialista de Tui