O guardés Denis Maza continúa coa presentación do seu libro -La Mística de un grano de arena-

O guardés Denis Maza, que vén presentando La Mística de un grano de arena dende outubro de 2020, está de ronda polas Feiras do Libro de Galicia. Estivo firmando exemplares da súa novela en Ourense e Redondela neste mes de xuño, e as próximas edicións o levarán a Vigo, Ponteareas, Pontevedra, Rianxo e A Coruña.

Denis Maza é graduado en Enxeñería en Electrónica Industrial e Automática, e actualmente desenvolve o seu labor profesional como profesor de Enerxías Renovables no CIFP Valentín Paz Andrade (Vigo).

Este proxecto, que en principio nada ten que ver co seu perfil técnico, é, en realidade, o rescate e posta en relevo dunha vocación por moito tempo aparcada. La mística de un grano de arena é, en palabras do autor, “o peche dun círculo vital”.

A idea da novela xorde, alá polo 2018, dentro dun contexto existencial de reencontro e reflexión persoal. A escritura sempre estivera na súa vida como vía de escape, aínda que ata este punto nunca se materializase en algo sólido e formal. Os seus estudos no grao de filosofía na UNED tamén foron claves á hora de afrontar este reto.

Na trama da novela, o protagonista principal acode á praia buscando respostas, atrapado nunha profunda crise existencial. A senda que alí comeza levarao por múltiples cruces de camiños.  Nesta travesía polo areal irase topando con personaxes que lle achegarán claves para reflexionar sobre os debates internos que o levaron ata alí, cada un deles dende as súas vivencias e perspectivas. Ademais de encontros de carne e óso, tamén xurdirán vívidos recordos que o levarán de viaxe pola súa memoria, rememorando momentos pasados e persoas que deixaron pegada na súa alma. Un periplo polos recunchos da conciencia, no que non terá máis remedio que lidar cos seus medos máis profundos e a súas propias resistencias narcisistas.

É esta, polo tanto, unha novela de reflexión, unha fábula existencialista que indaga na rede de sentidos e afectos que envolven a realidade do individuo, unha viaxe polas sendas do autocoñecemento, a autocrítica e a loita contra o ego.

Coñece máis sobre a novela e o autor:

https://www.letrame.com/autores/dennismaza/

Dispoñible en librerías do Baixo Miño (Atlántica, Ideas, Novidades).