O IEAMSo conmemora o centenario da mobilización social contra o Foro

Co motivo do centenario dos sucesos de Sobredo que se cumprirán o próximo 28 de novembro, dende o Instituto de Estudos Agrarios Mártires de Sobredo (IEAMSo) van levar a cabo unha serie de actividades que tentan visibilizar o centenario da gran mobilización social contra o Foro ao longo do ano de 1922.

A confrontación derivada da oposición aos embargos  que decretaba o Xulgado ao negarse a pagar o Foro, convocou á veciñanza e a intervención da Garda civil que rematou coa tráxica morte dos coñecidos como Mártires de Sobredo.

Esta campaña pola abolición do Foro iniciouse a partir dos acordos acadados no Congreso Agrario de Tui que se desenvolveu nesta cidade no Teatro Principal os días 28, 29 e 30 de Xullo do ano 1922. A partir dese momento desenvolvéronse ao Longo de todo o país actos de sensibilización e concienciación social promovida polas organizacións agrarias que procuraban a abolición do pago das renda señoriais sobre as terra agrícolas e a promoción de melloras Sociais, tanto en avances para o agro como en formación educativa e na organización da sociedade labrega daquela época.

Por este motivo, o IEAMSo programa, para o día 29 de xullo, unha conferencia co título de "O Congreso Agrario de Tui", impartida polo profesor da Universidade de Santiago, Miguel Cabo Villaverde, un dos grandes especialistas sobre o agrarismo. A conferencia terá lugar no Edificio Francisco Sánchez (antiga Área Panorámica), ás 20:00 hs.

O día 30 de xullo teñen programada, coa axuda de Xosé Martínez Tato de Andatui e coa colaboración do Concello de Tui da andaina co título "Memoria: espazos e tempos do Congreso Agrario de Tui a Sobredo". Un percorrido de 8,5 km que nos levará da praza de Frómista, diante do Teatro Principal, até o coñecido como Campos dos Mártires en Sobredo (Guillarei). O inicio da andaina será ás 8:30. Esíxese puntualidade.