OPTICALIA TUI É ESCOLLIDO COMO O ESTABLECEMENTO FAVORITO DOS CLIENTES DO CCA ZONA ABERTA DE TUI NA CAMPAÑA MÁIS QUE COMERCIO!

O xefe territorial de Economía e Industria, Ignacio Rial, fixo entrega esta mañá do diploma ao establecemento máis votado do concello de Tui dentro da campaña Máis que comecio! que está a organizar a Consellería de Economía e Industria e que recaíu en Opticalia. Neste acto entregáronse tamén os agasallos aos clientes gañadores, Roberto Ferreiro e Isabel Silva, que recibiron un cheque de 200 e 100 euros respectivamente.  

No acto estiveron presentes o primeiro tenente de alcalde, José Ángel Villaverde, así como  responsables do centro comercial aberto Zona Aberta de Tui, Carmen García Braga da Federación Galega de Comercio da provincia de Pontevedra e Yolanda Gayoso de Abanca.

Deste xeito, os participantes na iniciativa da Consellería de Economía e Industria Centros Comerciais Abertos. Máis que comercio!, que se desenvolveu durante todo o mes de decembro nos negocios asociados ao CCA de Tui elixiron como o seu establecemento favorito a Opticalia. "Este negocio foi o que máis clicks recibiu en www.maisquecomercio.com, web na que os clientes podían participar nun xogo en liña por cada 5€ de compra e optar a diferentes premios ao tempo que elixían o seu comercio preferido", engadiu o xefe territorial. Nesta páxina, votando ao seu establecemento favorito, os clientes tamén puideron optar a unha tarxeta regalo de 200 euros e dúas de 100 para mercar no comercio local, así como a diferentes agasallos.  

A iniciativa da Consellería de Economía e Industria Centros Comerciais Abertos. Máis que Comercio! está a percorrer os diferentes centros comerciais abertos de Galicia durante todo o ano, co obxectivo de resaltar os valores do comercio de proximidade como a calidade, o trato ao cliente, a diferenciación e a variedade. "O seu obxectivo foi impulsar as vendas do comercio de proximidade premiando a confianza dos seus clientes", explicou Rial. No caso de Tui, foron 6.169 as participacións (das cales, 217 foron as que recibiu o local gañador).

Ao mesmo tempo, tal e como sinalou o xefe territorial de Economía e Industria, destácase o traballo que desenvolven os centros comerciais abertos, unha fórmula que permite, desde o asociacionismo, o desenvolvemento de estratexias comerciais e a prestación de servizos de forma conxunta no pequeno comercio para mellorar a súa competitividade.

Ignacio Rial lembrou que o impulso ao asociacionismo é un dos eixos da estratexia específica da Consellería de Economía e Industria de apoio ao comercio de proximidade, dentro da cal se inclúe o programa de axudas ás asociacións de comerciantes para a dinamización dos centros comerciais abertos e prazas de abastos. O xefe territorial recordou que o pasado 13 deste mes saíu a nova liña de axudas para CCA dotada por 2,2 millóns de euros. "O ano pasado, coa mesma subvención, o CCA Zona Aberta de Tui resultou beneficiado con apoios por 33.000 euros", rematou Rial.