Os veciños do conxunto histórico de Tui interesados en vender unha propiedade poden presentar unha oferta ao programa Rexurbe antes do 9 de xullo

O director xeral do Instituto Galego da Vivenda e Solo, Heriberto García Porto, acompañado polo alcalde, Enrique Cabaleiro, mantivo unha reunión informativa con veciños do conxunto histórico de Tui co obxectivo de facerlles chegar a información sobre o programa Rexurbe.

Na charla, o director xeral explicoulles aos presentes os obxectivos do programa e as actuacións previstas no marco do mesmo no conxunto histórico do municipio, no que a Xunta pretende adquirir este ano inmobles para rehabilitar por importe de 250.000 euros, unha contía que se pode ampliar.

Os interesados en ofrecer as súas propiedades poden dirixir as súas ofertas ao Instituto Galego da Vivenda e Solo ata o 9 de xullo. Posteriormente, as vivendas serán rehabilitadas polo propio IGVS, que as destinará a alugueiro social.

Estes inmobles que a Xunta prevé adquirir este ano sumaranse ao que xa foi adquirido en 2020, emprazado no número 20 da rúa Obispo Castañón.

Cómpre recordar que o programa Rexurbe iniciouse en 2017 e xa rematou a rehabilitación das primeiras propiedades en Betanzos e Ferrol, localidades nas que se segue a traballar noutras vivendas, ao igual que en Lugo, Vilalba, Mondoñedo, Viveiro, Ourense e Ribadavia.

Ademais, na reunión, o alcalde e o director resolveron dúbidas e preguntas sobre a posibilidade de que a Administración local solicite a declaración dunha área Rexurbe na localidade, así como os trámites necesarios para iniciar a tramitación da mesma.