PLAY-DOC TUI ENTRE OS FESTIVAIS AUDIOVISUAIS GALEGOS RECIBIRÁN UNHA ACHEGA DE CULTURA E EDUCACIÓN

A Consellería de Cultura, Educación e Ordenación Universitaria resolveu a primeira convocatoria pública de subvencións para festivais do sector audiovisual coa adxudicación, en distintas contías, da dotación total de 90.000 euros entre cinco eventos dedicados á difusión dos distintos xéneros cinematográficos que se celebrarán en Galicia entre o 1 de xaneiro e o 31 de outubro de 2014.

Deste xeito, percibirán financiamento a través destas axudas o Festival Internacional de Documentais Play-Doc de Tui (24.373,57 euros), o Festival de Cans (20.660,81 euros), a (S8) Mostra de Cinema Periférico que se celebra na Coruña (17.360,58 euros), o Festival Internacional de Cine Euroárabe Amal (13.845,09 euros) e o Festival Internacional de Curtametraxes Curtocircuíto de Santiago de Compostela (13.750,95 euros).

Coa posta en marcha deste programa de subvencións a través da Agadic (Axencia Galega das Industrias Culturais), o departamento que dirixe Xesús Vázquez Abad da resposta ás suxestións recibidas desde o propio sector audiovisual, no sentido de regular a través dunha convocatoria pública o seu apoio económico a certames, semanas e mostras audiovisuais, que ata o momento se materializaba a través de diferentes acordos de colaboración e de patrocinio. A tramitación deste expediente realizouse a través dun anticipado de gasto, co propósito de facilitar a planificación dos certames aos adxudicatarios.

O seu obxectivo é optimizar, sistematizar e garantir a transparencia na adxudicación dos recursos públicos a este tipo de eventos, de xeito que o orzamento dispoñible para este fin sexa distribuído de acordo cunha serie de criterios obxectivos, así como da valoración da traxectoria, programación, viabilidade e interese dos proxectos presentados.

Criterios aplicados

As cantidades concretas adxudicadas, resultantes da aplicación dos criterios e baremos establecidos nas bases das subvencións, serán percibidas polos organizadores de cada festival. Entre os requisitos esixidos están o de desenvolverse en Galicia entre o 1 de xaneiro e o 31 de outubro de 2014, ou o de ter realizado un mínimo de tres edicións consecutivas inmediatamente anteriores á publicación da convocatoria.

A comisión de valoración analizou ademais a traxectoria dos festivais tomando en consideración datos relativos á súa programación, antigüidade, asistencia de público, repercusión nos medios de comunicación social, interese estratéxico para o sector e  impacto económico e cultural no territorio onde se celebra, entre outros aspectos.

Na avaliación dos proxectos tamén se tivo en conta a programación e duración da edición de 2014 de cada evento, a súa promoción do traballo dos realizadores galegos e o impulso á nova creación, as accións dirixidas ao fortalecemento do sector en Galicia, o seu carácter competitivo, os programas de cooperación, a contribución á formación de públicos, a presenza de autores, o plan de comunicación ou a edición do catálogo do evento.