ROUBAN, DESTROZAN E PRENDEN LUME NA ESCOLA UNITARIA DE MARZÁN NO CONCELLO DO ROSAL

Sobre as 5:00h da pasada madrugada deste Xoves 28 de Maio de 2015 a Central do CAE-112 Galicia recibía un aviso de incendio no barrio de Marzán, no termo municipal do Rosal.

Ata o lugar do suceso desprazáronse efectivos do GES de A Guarda, que chegados ó lugar extinguíron un incendio que afectaba a unha zona de despacho e almacén das Escolas unitarias de Marzán.

Ata o lugar do suceso desprazouse tamén unha patrulla da Guardia Civil, que investiga arestora o sucedido para esclarecer as causas do lume.

Todo apunta a que se tratou dun lume provocado, posto que o resto das aulas atopábanse revoltas e presumiblemente falta material das mesmas, polo que estaríamos falando dun roubo, que se suma os que xa se teñen producido ó longo da xeografía galega en centros educativos.

Os alumnos desta escola, menos de 10, tiveron que regresar ás súas casas esta mañá, posto que a Escola quedou inservible, tal e como nolo comunicaba esta mesma mañá o Alcalde en funcións do Concello do Rosal, Sr. Jesús Mª Fdez. Portela, quen condenou os feitos, que afectan gravemente á continuidade do curso escolar, posto que unha boa parte da escola xa non se poderá utilizar no que resta de curso académico.