Tui impulsa a tecnoloxía en galego: medio centenar de persoas doan a súa voz

Máis de cincuenta persoas de Tui doaron a súa voz a favor da presenza do galego nas novas tecnoloxías, nunha xornada de "captación de voz" organizada polo Proxecto Nós, que tivo lugar o pasado xoves na aula CEMIT do edificio Francisco Sánchez. Durante a xornada, que se desenvolveu dende as dez da mañá até as oito da tarde, ducias de voluntarios colaboraron activamente nesta iniciativa que procura facer que o galego forme parte de sistemas de intelixencia artificial como asistentes de voz, sistemas de navegación GPS e subtitulación automática.

O Proxecto Nós, impulsado pola Xunta de Galicia e a Universidade de Santiago de Compostela, elixiu a Tui como un dos 16 concellos participantes nesta campaña, contando ademais co apoio do Concello de Tui. A sesión contou coa participación de Enrique Cabaleiro, alcalde de Tui, e de Sonsoles Vicente, concelleira de Cultura, Ensino e Mocidade, quen foron dos primeiros en achegarse á aula CEMIT para realizar a súa doazón de voz, colaborando directamente coa causa.

Este proxecto busca que a nosa lingua poida ser empregada con total normalidade nas novas tecnoloxías, como os asistentes de voz (SIRI, ALEXA) ou en dispositivos de uso cotián, grazas a ferramentas que faciliten a comprensión e o uso do galego por parte das máquinas. Isto permitirá que en futuros desenvolvementos poidamos empregar a nosa lingua ao dar unha orde a un GPS, cun asistente de voz, ou nas transcricións automáticas de contidos audiovisuais.

O alcalde Enrique Cabaleiro expresou a súa satisfacción por ser Tui un dos municipios elixidos para participar nesta xornada, subliñando o alto grao de participación e colaboración por parte da veciñanza tudense.

As persoas que desexen colaborar poden aínda sumarse ao proxecto gravando a súa voz en liña na páxina oficial: https://doagalego.nos.gal.