Tui logra reducir o desemprego do 30% ao 12% en 10 anos grazas a políticas activas de emprego

O Concello de Tui celebrou un importante avance na loita contra o desemprego, logrando reducir a taxa de paro do 30,81% en 2013 ao 11,99% en decembro de 2024. Este descenso, que se traduce en 945 persoas desempregadas no municipio ao final de 2024, reflicte os esforzos levados a cabo polo goberno local e as diferentes administracións públicas para impulsar o mercado laboral e mellorar a empregabilidade da súa poboación.

O descenso progresivo do desemprego desde 2015, cando a taxa alcanzaba o 25,02%, é un reflexo directo das políticas activas de emprego implementadas polo Concello, así como das colaboracións entre entidades públicas e privadas para mellorar as oportunidades laborais. Entre as iniciativas clave destacan os 3 Programas Integrados de Emprego e os 3 Obradoiros de Emprego executados desde 2019, que mobilizaron máis de 2 millóns de euros e melloraron a empregabilidade de máis de 350 persoas. Estas accións foron complementadas co Servizo de Orientación Laboral, un recurso fundamental para acompañar e asesorar ás persoas en busca de emprego.

A concelleira de Emprego e Desenvolvemento Local, Beatriz González, subliñou a importancia de seguir apostando pola formación e a orientación para a inserción laboral. "O traballo desenvolvido dende o Concello está dando resultados positivos, e seguimos comprometidos en facilitar ferramentas aos nosos veciños e veciñas para mellorar a súa empregabilidade. Continuaremos traballando en programas que axuden a reducir o desemprego e ofrecer máis oportunidades", destacou González.

No que respecta ao desemprego por sectores, o sector servizos continúa sendo o que acumula maior número de desempregados, con 629 persoas, seguido pola industria (106), a construción (67) e a agricultura e a pesca (44). A discriminación de xénero tamén se reflicte na cifra de desempregados, xa que as mulleres representan o 59,47% do total (562 mulleres), fronte ao 40,53% de homes (383).

O Servizo de Orientación Laboral do Concello, situado no Centro Municipal de Formación en Guillarei, segue sendo un dos recursos máis eficaces para mellorar a empregabilidade. Durante 2024, 91 persoas utilizaron a bolsa de emprego municipal, das cales 36 lograron inserirse no mercado laboral. O servizo ofrece asesoramento personalizado, formación en ferramentas de busca de emprego, apoio na elaboración de currículos, e preparación para entrevistas, así como obradoiros de capacitación dixital, co obxectivo de reducir a fenda dixital na procura de traballo e na vida cotiá.

Este servizo tamén facilita a conexión entre persoas demandantes de emprego e empresas locais, facendo máis áxil o proceso de selección e facilitando a contratación de novos traballadores. As persoas interesadas en acceder ao Servizo de Orientación Laboral ou as empresas que necesiten apoio no recrutamento poden solicitar cita previa a través do teléfono 986 60 32 28 ou o correo electrónico orientacion@tui.gal.