Un home resulta ferido en Tui despois de saírse da vía ao entrarlle varias avespas no turismo que conducía

Un home que circulaba nun turismo sufriu unha saída de vía na PO-340 ao seu paso polo concello pontevedrés de Tui.

Segundo a información facilitada polos axentes de Tráfico ao 112 Galicia, o condutor perdeu o control do vehículo ao sufrir unha indisposición despois entrarlle varias avespas no habitáculo. Motivo polo que tivo que ser trasladado polos profesionais sanitarios a un centro sanitario.

A alerta sobre este accidente recibiuse no Centro Integrado de Atención ás Emerxencias 112 Galicia, ás 13:15 horas, a través da sinal de emerxencia do sistema eCall instalado no interior do turismo. Tamén, case ao mesmo tempo, unha persoa particular contactaba cos xestores de emerxencias para informar dunha persoa que precisaba asistencia sanitaria ao sufrir unha saída pouco antes do acceso á A-55, na parroquia de Randufe.

Con estes datos, ademais dos axentes da Garda Civil, desde o CIAE-112 Galicia púxose a situación en coñecemento de Urxencias Sanitarias de Galicia-061, dos Bombeiros do Porriño, da Policía Local e dos voluntarios de Protección Civil da localidade.

Ademais, o persoal do servizo de limpeza e mantemento da vía tamén se achegou ao lugar dos feitos, nada mais ser informado do suceso para recuperar as condicións de seguridade da vía.