VOLTAN OS MERCADOS DA VERDURA Ó CÁRCERE VELLO CON VENDA DE PRODUTOS ECOLÓXICOS, CHARLAS E MÚSICA

Co gallo da xornada inaugural non só se porán á venda verduras, senón outros alimentos frescos dun grupo de produtores con selo Ecolóxico da comarca, que nos mostrarán diferentes produtos, como mel, lácteos, pan e pizzas ecolóxicas, que se elaborarán no momento, para ou ben levalas ou comelas no mesmo sitio.

Na apertura do Mercado tamén estará Plácido Castro Fernández, Médico especialista en Nutrición e Dietética, que nos falará da alimentación e saúde, e dos beneficios de incorporar á dieta produtos ecolóxicos sen aditivos. Segundo Plácido Castro, " unha gran maioría das enfermidades da nosa civilización están en directa relación coa forma de alimentarnos (diabete, obesidade, hipertensión arterial, alteracións do colesterol, caries dentais,...). Ademais, a nosa alimentación incide directamente no rendemento, xa que os produtos frescos nos dan máis enerxía. Esta charla terá lugar ás 12h.

Xa ás 16:30h, o produtor de mel ecolóxica, Xosé Manuel, ofrecerá un taller para os máis pequenos, "A Maleta das Abellas", que nos contará todo o proceso que fan as abellas para elaborar o mel.

Ademais das charlas e talleres, esta Feira de produtores Ecolóxicos estará acompañada dun grupo de músicos de alumnos de gaita e percusión do Conservatorio de Tui, dirixidos polo profesor Eduardo Rodríguez Sobrino.

Este Mercado da Verdura está organizado pola Concellería do Casco Histórica do Concello de Tui, a APEGA (Asociación de Produtores Ecolóxicos Galegos) e Foro Tvde.