Falece un home ao traballar en contacto cunha alta concentración de monóxido de carbono en Tomiño

Un home perdeu a vida, a pasada noite, ao traballar en contacto con altas concentracións de monóxido de carbono, nun domicilio da localidade de Tomiño.

Pasadas as 21:00 horas, o 112 Galicia recibiu a chamada dun particular que solicitaba asistencia médica para dúas persoas que estaban inconscientes dentro dunha vivenda, no lugar do Hospital. O chamador indicaba que na casa había un forte olor semellante ao do gasóleo.

De inmediato, os xestores do CIAE-112 Galicia comunicáronlle esta información ao persoal sanitario, aos Bombeiros do Porriño, á Garda Civil e á Policía Local. Ademais, tamén se lle deu aviso aos membros do GES da Guarda e a Protección Civil do concello.

No momento no que os Bombeiros chegaron ao domicilio indicáronlle ao 112 que unha das persoas estaba falecida e outra afectada debido a unha alta concentración de gas, monóxido de carbono, que detectaton no punto. Así mesmo, comunicaron que este se podía deber a uns traballos que se estaban a realizar no interior da casa.

Pola súa banda, os servizos sanitarios confirmaron que unha muller necesitou ser trasladada ao centro de saúde ao verse afectada pola acumulación do gas.