O incendio dun galpón en Tomiño podería estar relacionado cunha candea acesa

Os efectivos de emerxencias relacionan un incendio nun galpón cunha candea acesa.

Este suceso produciuse na noite de onte (21:30 horas) no lugar de Tollo, en Tomiño, a onde se dirixiron os Bombeiros do Baixo Miño e membros do GES da Guarda para facer fronte ao lume, que acabou co alpendre e o seu contido: maquinaria, mobles, electrodomésticos e bombonas de subministro de gas.

Ademais, unha persoa necesitou asistencia médica debido a unha crise nerviosa provocada pola situación. 

As primeiras chamadas de emerxencia recibíronse no 112 Galicia por parte dos afectados, que alertaban da intensidade das lapas, pois xa devoraban o cuberto onde gardaban diverso material. Así, activouse un operativo no que participaron os Bombeiros do Baixo Miño e un equipo do GES da Guarda, ademais dos axentes da Policía Local. 

Pouco despois, eran os mesmos axentes de seguridade quen contactaban cos xestores do 112 para pedir, tamén, asistencia médica para unha muller afectada por unha crise de ansiedade. Deste xeito, acudiu unha dotación de Urxencias Sanitarias de Galicia-061.

Cando lograron extinguir o incendio, os efectivos de intervención relacionaron o suceso cunha candea acesa debido á falta de enerxía eléctrica no cuberto.