O Pesca 1 rescata ao tripulante dunha embarcación que envorcou na Guarda

O tripulante, con síntomas de hipotermia, foi rescatado da auga polo helicóptero do Servizo de Garda Costas de Galicia, que o trasladou ao Hospital Álvaro Cunqueiro.

Pasados dez minutos das seis e media desta mañá, un particular contactaba co 112 Galicia para alertar do suceso. Indicaba que acababa de ver como unha lancha envorcaba, cunha persoa a bordo, na Illa da Ínsua, na desembocadura do río.

Nada mais recibir a chamada do alertante, os xestores do 112 puxeron os feitos en coñecemento do persoal de Salvamento Marítimo e do Servizo de Garda Costas de Galicia. Tamén foron informados a Garda Civil, a Policía Local e o GES da Guarda. Ademais, ao tratarse dunha zona transfronteiriza, os xestores de emerxencia tamén informaron dos feitos ao persoal da Comandancia Naval do Miño, que mobilizaron dúas embarcacións.

Posto en marcha un amplo dispositivo de actuación con medios acuáticos e terrestres e, unha vez localizado o tripulante con vida, flotando na auga, o persoal de Salvamento confirmou ao 112 Galicia o rescate do home polo helicóptero Pesca 1, que o trasladou con síntomas de hipotermia ao Cunqueiro de Vigo. 

Embarcación volcada en la desembocadura del Miño con un tripulante.Movilizados: S/Mirach,Corvo Mariño @guardiacivil y Comandancia Naval del Miño. El Pesca I @gardacostasgal rescata al tripulante; trasladado al hospital Álvaro Cunqueiro/síntomas de hipotermia, pero en buen estado. pic.twitter.com/bDfT38vtPd

— SALVAMENTO MARÍTIMO (@salvamentogob) June 10, 2022