Regades acláralle ao BNG que son os votos ao partido socialista os que frean a VOX e garanten o progreso en Galicia e en España

A forza que detén á ultradereita é o Partido Socialista, destacou o candidato do PSdeG-PSOE ao Congreso pola provincia, David Regades, nunha xuntanza con cadros socialistas celebrado no parque da Illa das Esculturas,  en Pontevedra. Un encontro no que participaron integrantes da candidatura, como a número 1 ao Senado, Carmela Silva, e a número 2 ao Congreso, Marica Adrio.

“Ao BNG, que anda por aí postulándose como dique contra Vox, hai que dicirlle que se algo preocupa a Vox son os votos do Partido Socialista, que son os que sentan aos deputados/as e senadores/as suficientes nas Cortes Xerais para facer posible a maioría progresista que frea a Vox e aos seus socios do PP. Son os votos ao Partido Socialista os que lle paran os pés a Vox e garanten o progreso en Galicia e en toda España”, subliñou Regades.

O candidato recordou que o mellor xeito de combater á ultradereita é que o PSOE repita os 3 deputados/as e 2 senadores/as que logrou en 2019, pois o BNG, ao igual que Vox, carece de representación. “Nas Eleccións do 23 de xullo xogámonos un Goberno progresista encabezado polo Partido Socialista e Pedro Sánchez ou un Goberno de retroceso de PP-Vox; iso é o que nos xogamos porque é o que vai impactar nas nosas pensións e nos nosos dereitos, o demais son batallas menores”.

Regades destacou que nas últimas Xerais, en novembro de 2019, o PSOE foi primeira forza na provincia, cun 32,13% (166.377 votos), superando ao PP en case catro puntos. O BNG e Vox, recordou quedaron empatados en torno ao 7,5% e quedaron sen representación. “Estamos no “club” de provincias nas que o Partido Socialista supera sistematicamente o listón do 30% e imos esforzarnos ao máximo para volver logralo; esa debe ser a nosa contribución dende a provincia de Pontevedra para que Galicia e España sigan avanzando”.

Durante o acto participaron tamén Carmela Silva, que apostou por despregar unha campaña emocional, que conecte coa cidadanía e tamén de defensa do presidente do Goberno para combater a estratexia de despersonalización da dereita e a ultradereita. Marica Adrio, pola súa banda chamou a defender os logros do Goberno “que ninguén discute”.