Tui celebra o Nadal e os 800 anos da súa catedral cun concurso de debuxo para estudantes de Primaria

Tui busca a súa postal para felicitar o Nadal, e faino cunha proposta moi especial. Coincidindo co 800 aniversario da consagración da catedral de Tui, o Concello, a través da Concellería de Ensino, Cultura e Mocidade, convoca unha nova edición do Concurso de Debuxo Escolar, un certame xa consolidado que aposta pola creatividade e participación do alumnado tudense.

O concurso vai dirixido ao alumnado de Educación Primaria dos centros educativos do municipio, tanto públicos como concertados. As bases da convocatoria poden consultarse no Boletín Oficial da Provincia de Pontevedra e no taboleiro de anuncios do Concello.

Nesta edición, o tema central será o “Nadal en Tui”, cunha especial atención á catedral tudense, que este ano cumpre oito séculos da súa consagración. A finalidade é que os nenos e nenas expresen, a través dun debuxo, o significado do Nadal e a súa relación co patrimonio e as tradicións da vila.

Cada participante poderá presentar un único traballo orixinal e inédito, con técnica libre. Os centros educativos serán os encargados de realizar unha primeira selección, enviando á Concellería as doce mellores postais para que o xurado municipal elixa as gañadoras. O prazo de presentación dos debuxos remata o 21 de novembro ás 14:00 horas.

O certame establece tres premios en material educativo e de pintura: o primeiro, valorado en 100 euros, converterase na postal oficial de Nadal do Concello de Tui; o segundo, dotado con 50 euros; e o terceiro, con 40 euros.

A concelleira de Ensino, Cultura e Mocidade, Sonsoles Vicente Solla, destacou que este concurso “pretende fomentar a expresión artística e a participación activa da infancia tudense nas tradicións do Nadal, ao tempo que se implica aos máis pequenos na celebración do 800 aniversario da catedral, unha efeméride que pertence a toda a cidadanía”.

Con esta iniciativa, o Concello de Tui continúa fortalecendo o vínculo entre arte, patrimonio e educación, situando ás novas xeracións como protagonistas dun Nadal cheo de historia, cultura e creatividade.