A Deputación adxudica o novo servizo de padrón electrónico para os concellos, que permitiu á veciñanza facer ata 275.000 xestións sen ter que desprazarse

A Deputación de Pontevedra deu luz verde en xunta de goberno á adxudicación do novo contrato do padrón electrónico, do que se benefician actualmente 36 concellos da provincia. A presidenta Carmela Silva explicou que este servizo, posto en marcha en 2018, facilitou á veciñanza facer ata 275.000 xestións sen ter a necesidade de desprazarse, e manifestou que “é un instrumento moi potente que facilita a vida da xente e dá apoio aos concellos, que carecían dos recursos para afrontar esta obriga”. A institución provincial asume o 75% do custo do contrato, adxudicado por 287.400 euros a AYTOS Soluciones Informáticas por un período de dous anos prorrogables por outros tantos, mentres que os concellos sufragan o 25% restante.

“O servizo verase ademais optimizado con servidores máis rápidos e melloras na seguridade dos datos para evitar ciberataques”, explicou a presidenta, quen sinalou que a aportación municipal oscila entre os 500 euros anuais para os concellos de menos de 5.000 habitantes e os 3.000 para aqueles con poboación entre 30.000 e 50.000 veciñas e veciños. Actualmente empregan este servizo  A Cañiza, A Estrada, Agolada, A Guarda, A Lama, As Neves, Arbo, Baiona, Bueu, Campo Lameiro, Cangas, Covelo, Crecente, Cuntis, Forcarei, Gondomar, Lalín, Mondariz, Mondariz-Balneario, Meaño, Moaña, Moraña, Oia, O Grove, O Rosal, Ponte Caldelas, Ponteareas, Portas, Sanxenxo, Silleda, Tomiño, Tui, Vila de Cruces, Valga, Barro e Vilaboa.

Expedientes dixitais

O padrón electrónico que a Deputación achegou aos concellos supuxo a fin dos expedientes en papel e “para entender a súa relevancia na vida da xente e dos concellos só hai que ver os datos”, sinalou Carmela Silva. Nestes catro anos emitíronse en sede electrónica ata 275.722 certificados, documento necesario en numerosos trámites administrativos, mentres que outros 294.000 foron emitidos en formato presencial empregando a tecnoloxía brindada pola Deputación.

Así, o sistema tramitou máis de 26.400 baixas e 36.600 altas nos padróns dos concellos, mentres que preto de 40.000 persoas comunicaron modificacións dos seus datos persoais. Neste tempo rexistráronse 21.300 cambios de domicilio, 21.374 rectificacións de datos domiciliarios e 4.500 renovacións de trámites de estranxeiros. “Este importante volume xestiónase a través dun modelo na nube, o único requisito é o ordenador e o acceso a Internet, o que evita que os concellos se vexan obrigados a afrontar gastos informáticos”, apuntou a presidenta.