A Xunta lamenta que a Deputación de Pontevedra rache a unión de Galicia no stand da Xunta en FITUR

A Xunta lamenta que a Deputación de Pontevedra rache a unión de Galicia no stand de Fitur e anunciara hoxe que non vai utilizar o espazo común na feira, que se celebrará en Madrid entre o 19 e o 23 de xaneiro.

A Xunta pediu a todos os organismos que van facer uso do espazo que reservaran cinco asentos para os representantes autonómicos, tal e como explicou por carta a directora de Turismo de Galicia, Nava Castro, aos organismos e entidades invitados a participar no encontro. Con esta medida queríase, ademais, evitar que se repetira a escena da pasada edición, na que a presidenta da Deputación de Pontevedra, Carmela Silva, tratou de expulsar do stand do Goberno galego á propia delegada da Xunta en Vigo, Marta Fernández-Tapias, como recolleron as testemuñas e as imaxes da xornada.

A responsable de Turismo da Deputación de Pontevedra, Ana Laura Iglesias, respondeu a esa misiva cun escrito no que expresaba a súa “rotunda desconformidade” con esa medida e argumentando que as limitacións pola pandemia obrigaban a “reducir drasticamente” as invitacións cursadas.

A directora de Turismo de Galicia, Nava Castro, respondeu á deputada provincial que non é a Deputación de Pontevedra a que debe reservar un espazo á Xunta de Galicia, senón que “é a propia Administración autonómica a que decide a súa presenza nas presentacións que se realicen no stand, como propietaria e promotora do mesmo”.

Nava Castro recordoulle a Ana Laura Iglesias que aceptar ou non a invitación a participar no stand da Xunta era voluntario, pero que “non deixa de ser significativo” que das máis de 40 administracións e institucións ás que a Xunta convidou a participar en Fitur, a Deputación de Pontevedra fora a única, a día de hoxe, que manifestara a súa “oposición rotunda” e a “imposibilidade de asumir” a presenza da Xunta stand da propia Administración galega.

Nava Castro lamentou a decisión da Deputación de Pontevedra, que racha co tradicional uso compartido do stand, que serve de espazo común para toda Galicia. “Eu non sei a quen lle pode molestar que se reserven 5 asentos de 37 salvo que o que se busque sexa unha política de confrontación, unha vez máis”. Castro aludiu tamén ao episodio sufrido na pasada edición de Fitur, que a directora de Turismo de Galicia cualificou como “unha falta total de cortesía institucional por parte de responsables desta institución provincial”.