A Xunta reforza a coordinación cos alcaldes de Pontevedra ante a vaga de incendios forestais en Galicia

O delegado territorial da Xunta en Pontevedra, Agustín Reguera, mantivo este martes unha reunión cos alcaldes da provincia co obxectivo de reforzar a coordinación fronte á vaga de incendios forestais que afecta a Galicia neste mes de agosto. No encontro tamén participou o xefe do Servizo de Prevención de Incendios Forestais, Manuel Francisco Gutiérrez.

Reguera salientou que Galicia vive unha situación “excepcional”, na que a defensa das persoas e das vivendas é prioridade absoluta. Subliñou ademais que, malia que Pontevedra non está a rexistrar a mesma gravidade que outras provincias, é fundamental manter os canais de comunicación e resposta activados para anticiparse a calquera risco.

Segundo datos da Consellería do Medio Rural, desde o 1 de agosto rexistráronse 492 incendios en Galicia, 370 máis que no mesmo período do ano pasado. Só na xornada do domingo chegaron a declararse arredor de 30 novos focos.

Para facer fronte a esta emerxencia, a Xunta despregou o maior operativo da súa historia, composto por máis de 3.000 profesionais, 32 medios aéreos, 580 motobombas, 56 buldóceres, 10 batracios e o apoio da Policía Autonómica, UME e Forzas e Corpos de Seguridade do Estado.

Durante a reunión, solicitouse aos alcaldes que extremen a vixilancia en zonas sensibles, como áreas de interface urbano-forestal, espazos naturais protexidos ou zonas de alta carga vexetal. Tamén se lles pediu revisar as faixas secundarias, activar os puntos de auga municipais e constituír as brigadas previstas nos convenios.

Reguera advertiu ademais do carácter intencionado de moitos lumes, reiterando a política de “tolerancia cero” da Xunta fronte a quen pon en perigo vidas humanas e fogares: “exixiremos que todo o peso da lei caia sobre os responsables”.