Begoña Caamaño, figura feminista e cultural, protagonista das Letras Galegas 2026

A Real Academia Galega (RAG) anunciou este venres que Begoña Caamaño será a figura homenaxeada no Día das Letras Galegas 2026. A decisión foi tomada durante o pleno ordinario celebrado no pazo municipal de María Pita, na cidade herculina. A elección recoñece a súa obra literaria comprometida co feminismo, así como unha traxectoria xornalística marcada pola defensa da lingua galega e dos dereitos sociais.

Nacida en Vigo en 1964 e falecida en 2014 aos 50 anos, Begoña Caamaño destacou como novelista serodia con dúas obras clave: Circe ou o pracer do azul (2009) e Morgana en Esmelle (2012), nas que reescribiu mitos clásicos dende unha ollada feminista. A súa narrativa ofrece novas interpretacións dos relatos da Odisea e da materia de Bretaña, subvertendo os roles tradicionais de xénero e promovendo unha visión crítica e ética do poder.

A RAG sinala que a súa figura “dialoga coa contemporaneidade” e que a súa produción literaria e xornalística é “unha voz coral” que contribúe ao pensamento colectivo e á reflexión social. Caamaño foi tamén unha firme defensora dos dereitos humanos, a igualdade e a xustiza social, causas que marcaron a súa traxectoria vital e profesional.

No eido do xornalismo galego, Caamaño iniciouse en Vigo, traballando en emisoras locais como Radio Noroeste e Radio Popular. A partir de 1989, formou parte da Radio Galega, onde destacou en programas como Diario Cultural ou Club Cultura. Tamén colaborou con medios como A Nosa Terra, Tempos Novos ou Novas da Galiza e foi presidenta do Comité Interempresas da CRTVG, ademais de fundadora da Asociación de Mulleres Galegas na Comunicación.

A elección de Begoña Caamaño como protagonista das Letras Galegas 2026 supón tamén unha chamada de atención sobre a importancia dun xornalismo comprometido coa verdade, a cidadanía e o uso da lingua galega, nun momento especialmente delicado para os medios públicos.

A candidatura foi presentada por destacadas académicas como Ana Romaní, Marilar Aleixandre, María López Sández, Margarita Ledo Andión e Chus Pato, quen destacaron a súa capacidade para facer da literatura e do xornalismo ferramentas de coñecemento, activismo e transformación social.