Comunicado da Plataforma en Defensa da Hostalería Galega

A PLATAFORMA EN DEFENSA DA HOSTALERÍA GALEGA, que agrupa e representa a Asociacións de Hostalería de toda Galicia, a máis de 4.000 negocios de tódalas ramas deste sector, diante das novas disposicións anunciadas pola Xunta de Galicia no día de onte, quere facer as seguintes consideracións:

Primeira.- Unha vez máis as medidas adoptadas son arbitrarias, discriminatorias e sen soporte científico-técnico, en gran medida froito da habitual falta de diálogo co sector real.

Segunda.- A discriminación é palmaria segundo o tipo de licenzas, sen valorar os usos, algo que vimos denunciando dende fai meses. Especialmente agresiva contra a hostalería que tiña actividade nocturna que veu imposibilitado exercela incluso nas terrazas en horario diurno.

Terceira.- En canto a esixencia de equipar con medidores de CO2, só para facer o servizo dentro dos locais de 21:00 ate as 23:00 horas, máis que unha medida sanitaria parece un despropósito máis, unha nova falta de sentido común. A Xunta de Galicia, neste asunto, chega de novo tarde e mal. Se escoitara ao sector, fai meses que se plantexou esta idea en toda a franxa horaria para poder ampliar a porcentaxe de aforo permitida no interior. Neste plano, tendo en conta a delicada situación económica de tódolos negocios, demandamos as liñas de axudas para acceder aos medidores.

Cuarta.- O sector hostaleiro non é o problema, como se demostra en países que tendo pechado dende novembro sufriron a terceira e a cuarta vaga. Polo tanto pendimos responsabilidade á Xunta de Galicia, que dialogue co sector e que abandone a política errática na que está instalada. Que se poña á fronte do sector na demanda dun PLAN DE RESCATE REAL que evite a quebra de miles de autónomos e pequenos empresarios, a perda de miles de postos de traballo.

Quinta.- Tamén lle esiximos á Xunta de Galicia que non siga ca liña de “cortar polo san” para autoprotexerse. Na delicada situación económica na que nos atopamos as decisión teñen que ser máis ponderadas, os matices significan a ruina ou a supervivencia. Polo tanto as decisións débense tomar en base aos datos reais e aos parámetros que a propia Xunta de Galicia define. Non se poden subir de nivel de restriccións de xeito discrecional e preventivo: así calquera goberna. Se esas decisión afectaran aos soldos de quen as adopta seguro que entre o branco e o negro atoparían moitos grises.