Galicia Suroeste lidera -Ruralmente-, unha iniciativa para poñer en valor os produtos con selo de calidade

Xa está en marcha “Ruralmente”, un proxecto pioneiro liderado polo Grupo de Desenvolvemento Rural Galicia Suroeste que nace co obxectivo de impulsar a innovación, o intercambio de coñecementos e a posta en valor dos produtos con Indicación Xeográfica Protexida (IXP). A iniciativa, que recibiu máis de 200.000 euros de financiamento procedente do Fondo Europeo Agrícola de Desenvolvemento Rural (Feader), comezará a súa execución en xuño e terá unha duración de 15 meses.

A agrupación responsable do proxecto está composta polos GDR Galicia Suroeste —como entidade coordinadora—, AD Limia – Arnoia (Ourense) e Desarrollo Integral del Valle del Ambroz (Cáceres). O consorcio acadou a sexta mellor puntuación entre as 38 propostas presentadas, consolidando así a súa aposta polo desenvolvemento territorial sostible a través da promoción das IXP.

“Ruralmente” artéllase arredor da organización de xornadas técnicas, seminarios e visitas de campo co fin de compartir coñecementos sobre tecnoloxía, xestión e promoción de produtos amparados por selos de calidade diferenciada, como as Indicacións Xeográficas Protexidas e as Denominacións de Orixe Protexidas (DOP). Cada un dos GDR participantes centrará as accións nun produto estratéxico para o seu territorio.

Galicia Suroeste focalizará os seus esforzos na valorización do Pan do Porriño, mentres que o GDR Limia – Arnoia traballará na potenciación da Pataca de Galicia, buscando incrementar a produción e a adhesión de novas entidades produtoras. Pola súa parte, o GDR Valle del Ambroz orientará o seu traballo á promoción do Pimentón de la Vera, especialmente na súa aplicación a embutidos de porco ibérico.

A finalidade última de “Ruralmente” é fortalecer a competitividade das zonas rurais mediante o fomento da calidade, a sostibilidade e a innovación. As actividades están dirixidas a produtores, transformadores e elaboradores de alimentos que contribúen á identidade dos seus territorios. O proxecto tamén procura facilitar o arraigo no rural, incentivando que os axentes locais comercialicen directamente os seus produtos, coidando do territorio e aproveitando os recursos endóxenos.

Os obxectivos específicos do programa inclúen:

• Poñer en valor os produtos e actividades propios de cada territorio.

• Incentivar o mantemento da poboación no rural mediante a comercialización directa e o aproveitamento sostible dos recursos.

• Promover a adhesión a selos de calidade por parte de empresas locais, fortalecendo a súa proxección no mercado.

“Ruralmente” enmárcase nas Intervencións supra autonómicas do Plan Nacional da Política Agraria Común 2023 – 2027, e representa un exemplo de cooperación eficaz entre territorios, unindo estratexias, capacidades e innovación para construír un rural con futuro.