Incremento dos controis nas Pontes Internacionais con Portugal

A subdelegada do Goberno en Pontevedra, Maica Larriba, mantivo hoxe unha videoconferencia cos alcaldes de Arbo e Tui e as alcaldesas de Salvaterra e Tomiño que solicitaran un incremento dos controis nas pontes internacionais con Portugal. A subdelegada estivo acompañada polo coronel xefe da comandancia da Garda Civil, Simón  Venzal.

Neste encontro telemático a subdelegada ofreceu aos alcaldes e alcaldesas a información sobre o volume de controis que  “foron intensos” e desenvolveron nas cinco pontes internacionais do Miño unha vez que a autoridade competente delegada decretou o peche perimetral da comunidade autónoma galega o pasado día 23 de decembro.

Nestes corenta días fixéronse 637 dispositivos de control, vixiando a 5.433 persoas e 4.319 vehículos, abrindo 88 expedintes de sanción. “Para esta subdelegación foi prioritario o control dos peches perimetrais pero hai que lembrar que ata hoxe as fronteiras non están pechadas”, subliñou Maica Larriba.

Os alcaldes e alcaldesas agradeceron á subdelegada a prontitude da resposta a súa demanda e incidiron na sensación e no medo da poboación das súas localidades ao ver a cidadáns de Portugal facendo compras ou repostando combustible nas súas vilas dado a expansión da pandemia no Norte luso. A subdelegada recordou que aos cidadáns lusos, ate de agora, aplicábase a mesa normativa que aos galegos co cal podían achegarse a traballar ou facer compras de primeira necesidade pola proximidade.

Por outra banda, os representantes municipais mostraron a súa inquedanza polo anuncio de Portugal de pechar as súas fronteiras para os seus cidadáns  a partir do domingo e o efecto que terá sobre as pontes internacionais do Miño.

Ante isto, Maica Larriba subliñou que “como saben o Tratado de Schengen establece a liberdade de movementos para persoas e bens en todo o territorio da Unión Europea. Isto supón que para reintroducir o control de fronteiras débese realizar unha negociación entre ambos países. Nese momento é no que nos atopamos ultimando os detalles como  son os pasos fronteirizos afectados ou  as excepcionalidades entre outros”. 

A subdelegada comprometeuse cos alcaldes e alcaldesas a mantelos informados sobre a evolución e as noticias sobre o que aconteza nesta negociación entre ambos países.