José Miñones reivindica en FITUR os 145M euros que o Goberno de Pedro Sánchez inviste na consolidación de Galicia como destino cultural e patrimonial e na modernización do sector

O delegado do Goberno en Galicia, José Miñones, reivindicou hoxe en FITUR os 145 millóns de euros que o Goberno de Pedro Sánchez está a investir para a modernización do sector turístico galego e a consolidación de Galicia como un destino turístico sostible, dixital e verde que repousa no seu patrimonio e na cultura.

José Miñones desprazouse ata a Feira Internacional de Turismo onde apoiará nas xornadas de hoxe a mañá a presentación de distintas accións e iniciativas turísticas impulsadas por administracións galegas e que contan coa financiación do Goberno de España. Durante a mañá estivo nas presentacións das ofertas turísticas das cidades de Santiago e A Coruña e tamén acudirá á presentación do Plan de Sostibilidade Turística do Baixo Miño. Tamén asistirá ás presentacións de iniciativas de deputacións e doutros concellos e comarcas como a Costa da Morte.

Estas accións forman parte das políticas de sostibilidade turística, que puxo en marcha o actual Ministerio de Industria, Comercio e Turismo en 2020 e que se concretaron en cinco convocatorias (dúas extraordinarias e tres ordinarias). O delegado subliñou a relevancia deste programa, unha iniciativa da ministra Reyes Maroto, en Galicia, onde o Goberno apoia 34 plans de sostibilidade impulsados por concellos e deputacións con 85,7 millóns de euros. Entre estes plans, atópanse destinos tan relevantes como a Ribeira Sacra, Turismo termal en Ourense, a cidade de Santiago, ou distintas accións dentro dos Camiños de Santiago ao paso pola comunidade.

Patrimonio cultural de uso turístico

A segunda liña de investimentos do Ministerio de Industria céntrase na recuperación do patrimonio histórico e cultural para o seu uso turístico, unhas actuacións que se realizarán con criterios de accesibilidade, eficiencia enerxética e sostibilidade. Neste ámbito, o Goberno está a investir en Galicia 49,26 millóns de euros para a restauración de Bens de Interese Cultural de forma que se incorporen con garantías ás ofertas culturais de comarcas e concellos galegos.

Desta cantidade, 22,7 millóns destínanse ao patrimonio vinculado ao Camiño de Santiago con actuacións tan relevantes como a que se está a desenvolver no Parque do Pasatempo, en Betanzos, ou no complexo monumental da vila de Monterrei. A eles únese o investimento programado de 3 millóns de euros no Pazo de Raxoi, en Santiago, dentro da liña para cidades Patrimonio da Humanidade.

Os restantes 23,5 millóns de euros, ata completar o total, destinaranse a restaurar BICs vinculados aos Paradores de Turismo en Galicia. O Goberno afrontará sete proxectos para mellorar patrimonio en sete paradores das catro provincias galegas.

Modernización de establecementos turísticos

Xunto ao patrimonio e a accións sobre os destinos, o Ministerio de Industria, Turismo e Comercio apoia a modernización dos establecementos turísticos de Galicia, para facelos máis eficientes enerxeticamente. Este apoio concrétase a través da Xunta de Galicia, a quen o Goberno transferiu 8,7 millóns de euros para financiar unha orde de axudas específica para estas empresas. O delegado subliñou que esta convocatoria xa está aberta e a través dela o Ministerio prevé chegar a 121 establecementos turísticos de Galicia.