José Miñones traslada ás empresas de Galicia a disposición de 2.000 axentes de Policía e Garda Civil para garantir o dereito ao traballo ante o paro do transporte por estrada

O delegado do Goberno en Galicia, José Miñones, trasladou hoxe ás empresas galegas que a Delegación do Goberno  traballa para garantir o dereito daqueles que opten por traballar durante as xornadas que dure o paro convocado por unha parte minoritaria do sector do transporte por estrada. Afirmou que a Delegación do Gobierno coordina desde o pasado luns un dispositivo que mobiliza a 2.000 axentes de Policía Nacional e de Garda Civil nas catro provincias co obxectivo de garantir o dereito ao traballo e á actividade.

Tras un acto celebrado esta mañá en Vigo, Jose Miñones advertiu que o Goberno “non pode tolerar os actos violentos e as coaccións contra os transportistas”,  e que traballa para dar todas as garantías para o transporte de servizos esenciais nas estradas de Galicia. Así, desde o luns, as forzas de seguridade xa realizaron 400 acompañamentos a transportes ata a mañá de hoxe e están en contacto permanente coas empresas que queren traballar “e que son a maioría”, indicou.

O delegado lembrou que este paro foi convocado por unha plataforma minoritaria do sector, que non forma parte do Comité Nacional de Transporte por Estrada. É este órgano, que representa a mais do 90% das empresas do transporte en España, o foro para negociar estas demandas e no que onte compareceu a ministra de Transportes, Mobilidade e Axenda Urbana. “Precisamente, o propio Comité manifestouse en contra desta protesta”, insistiu.

Dispositivo

A Delegación do Goberno e as catro subdelegacións provinciais traballan desde o pasado luns de maneira coordinada coa Garda Civil e a Policía Nacional para amortiguar o impacto deste paro.

En concreto, reforzouse a presenza en zonas como os portos, os accesos aos polígonos industriais ou as vías de comunicación principais. Ademáis, manteñen o contacto permanente e constante co empresariado e coas persoas afectadas con diferentes solucións pensadas para cada caso.