Luis López anuncia que a comisión territorial da Xunta en Pontevedra celebrarase de xeito itinerante polos 47 concellos da área

O delegado territorial da Xunta en Pontevedra, Luis López, anunciou esta mañá, durante a celebración da Comisión Territorial de Coordinación, que pretende celebrar as reunións deste órgano -o de maior representatividade da delegación do Goberno galego na área territorial- de xeito itinerante polos 47 concellos que a conforman “para achegar aínda máis o labor da Xunta aos cidadáns”.

Deste xeito, preténdense descentralizar estas xuntanzas de coordinación, nas que participan as once xefaturas territoriais e que teñen unha periodicidade mensual, por todo o territorio, aínda que o representante autonómico advertiu que haberá que agardar algunhas semanas ata que avance a inmunización fronte a covid-19 e a situación sanitaria permita a súa celebración segura sen ningún tipo de risco.

“A Xunta traballa e preócupase todos os días polas galegas e galegos e polas súas necesidades e céntrase en atender todas as situacións e mellorar a súa calidade de vida, polo que queremos estar aínda máis preto deles e dos concellos para escoitalos e que sintan de cerca o apoio e o compromiso do seu goberno”, explicou o representante autonómico, que tamén cre “fundamental” achegar o máximo posible a acción do executivo galego aos cidadáns.

Neste senso, cómpre lembrar que a área territorial de Pontevedra conta con 47 municipios distribuidos por nove comarcas: Pontevedra, Caldas, O Salnés, O Morrazo, Deza, Tabeirós-Terra de Montes, Baixo Miño, O Condado e A Paradanta, e a intención da delegación céntrase en celebrar alomenos unha xuntanza en cada unha destas bisbarras ao longo da presente lexislatura autonómica.