O Apalpador conta a súa historia cun divertido espectáculo no Rosal

O Apalpador é un personaxe da tradición popular galega nacido no Courel, un pastor mangallón e de bo carácter, con ollada doce e longas barbas coradas que, co seu abrigo cheo de remendos e a grandes zancadas, percorre Galicia enteira. E este venres 23 de decembro chega ao Rosal para divertir a pequenos, pequenas e maiores contando a súa historia.

Será ás 18.00 horas no auditorio municipal e da man da compañía Títeres Cachirulo, que representará ante o público Rosaleiro ‘A historia do Apalpador’, un divertido espectáculo de monicreques que nos permitirá debullar o día a día desta peculiar figura que visita a nenos e nenas cada Nadal. E é que, durante o ano o Apalpador fabrica carbón, vive dos froitos silvestres, recolecta mel e fai aparecer coas ramas dos bosques os xoguetes que as madeiras esconden. O 31 de decembro baixa aos pobos, visita aos nenos e nenas casa por casa e lles deixa como agasallo castañas quentes e divertidos regalos de madeira.

Creada en 1985, a compañía Títeres Cachirulo caracterízase por unha rica produción de espectáculos que combina textos clásicos con autorías propias dunha gran variedade técnica. Coas súas obras levan percorrido os escenarios de numerosas programacións e festivais internacionais tanto en Europa como en América, colleitando importantes premios.

A alcaldesa, Ánxela Fernández Callís, convida a todos os rosaleiros e rosaleiras a desfrutar deste espectáculo familiar que sen dúbida fará as delicias dos máis cativos e cativas da casa. A entrada será de balde ata completar aforo.