O BNG reivindica que as súas xestións en Madrid permiten circular ida e volta Tui-Vigo pola AP9 -por menos do que custa un café-

O BNG do Baixo Miño vai lanzar unha campaña informativa sobre as bonificacións conseguidas en Madrid polo grupo nacionalista para que as persoas que circulan entre Tui e Vigo pola AP-9 poidan beneficiarse de descontos e mellorar as súas condicións de desprazamento. O Bloque reivindica que grazas ás súas xestións no pacto de investidura o prezo do traxecto redúcese ata os 0,85 céntimos de euro, o que supón unha rebaixa de ata o 87,5% con respecto á tarifa ordinaria. A formación nacionalista considera que esta medida é a de maior transcendencia conseguida para o conxunto do Baixo Miño en moitos anos.

O Bloque Nacionalista Galego lembra que a mellora negociouse polo apoio á investidura do presidente do Goberno, estando implantadas as bonificacións desde o pasado 1 de xaneiro. Para o tramo Tui-Puxeiros, que afecta a todo o Baixo Miño, as rebaixas chegan ata o 87,5% para viaxes de ida e volta nun período de 24 horas en réxime de superconcurrencia (un mínimo de dez días -20 viaxes- nun mes). Deste xeito o importe diario dunha persoa traballadora que utiliza este traxecto con esa frecuencia o custe sería de 85 céntimos de euro. Para frecuencias inferiores o prezo sería de 1,70 euros, o que suporía un desconto do 75%.

A medida, apunta o BNG, reflexa a vontade nacionalista de achegar os servizos e infraestruturas públicas á xente. Engade a formación que é preciso darlle difusión para que as posibles persoas  beneficiarias sexan coñecedoras de que poden mellorar as súas condicións de desprazamento e pago na AP-9. Segundo as últimas cifras de aforos que se manexan, a intensidade media diaria de vehículos no treito entre Tui e Puxeiros é de preto de 54.000 vehículos, todos eles potenciais beneficiarios das bonificacións.

Subliña o Bloque que as traballadoras que diariamente se teñen que desprazar a Vigo, por citar un exemplo, teñen ao seu alcance un aforro considerable para circular pola autoestrada. Hai que ter en conta que a alternativa é facelo pola A-55, o que obriga a atravesar as ‘curvas de Mos’, un dos puntos negros máis perigosos da rede viaria do Estado. “Vigo agora está máis preto do Baixo Miño, o que supón un paso máis na súa loita por mellorar a comunicación entre a comarca e a área metropolitana de Vigo, a cidade de referencia”, sinalan.

Con estas vantaxes  conseguidas, as nacionalistas reivindícanse como unha forza útil e defenden a política como unha ferramenta necesaria para mellorar a vida das persoas cando se fai bo uso dela. “Aínda que todo asemella un ambiente de crispación e desafección da cidadanía, no BNG queremos mostrar que estamos centradas no noso labor de mellorar as condicións de vida das persoas”, manifestan.

Consideran que isto é un paso máis, moi importante para popularizar o uso da AP-9, pero seguirán adiante na súa intención de liberalizada de peaxes. A autoestrada máis importante de Galiza, que vertebra o territorio máis activo e produtivo do país ten que deixar de ser un negocio privado para uns poucos.