O goberno local de Tui aposta por instalar as atraccións de San Telmo na Finca Patazumba

O goberno local de Tui fai unha aposta de futuro na ubicación das atraccións durante as festas de San Telmo trasladándoas a un novo emprazamento, que dista 200 metros do actual, o que permitirá unha mellor ordenación dos distintos postos, así coma poder contar co aparcamento da traseira da Área Panorámica durante uns días de gran afluencia á cidade coma son os festexos patronais. A decisión obedece tamén ao emprazamento que se viña empregando ata o de agora nas inmediacións do novo Centro de Saúde na rúa Casal Aboy, que presta o servizo de urxencias dende o PAC durante de 20h a 8 e as fins de semana, evitando así o ruído xerado polas atraccións aos posibles pacientes. Dende o goberno local tense en conta amais que os terreos situados na traseira da Área Panorámica non son só de propiedade municipal, senón que tamén pertencen en parte á Xunta de Galicia. E por outra parte é un desexo do goberno retirar as atracción do centro dunha zona con alta densidade de poboación, dando resposta a unha vella reivindicación dos veciños.

Dende o Concello de Tui ponse a dispor dos feirantes un novo emprazamento a poucos metros do que se viña empregando ata o de agora, na coñecida coma Finca Patazumba. O acordo chegado cos propietarios do inmoble de cesión gratuíta dos terreos permite ao concello dispor dos mesmo, ao tempo que acondicionalos para estean nas condicións axeitadas. Así estes días estase a nivelar o chan e ao tempo estase a instalar a conexión á rede eléctrica precisa.

Deste xeito o goberno municipal responde ao escrito feito público polos empresarios que acoden cada ano ás Festas de San Temo coas atraccións e outros postos. Con respecto a outra das críticas que fan os feirantes, sobre a celebración do concerto de Mago de Oz nas cercanías, explican dende o goberno que este espectáculo terá lugar na rúa Compostela e será durante tres horas, mentres que as atraccións permanecen en Tui durante 21 días.

Por último o goberno municipal insiste na súa decisión de retirar da traseira da Área Panorámica as atraccións das festas, non só neste ano senón tamén no futuro. Entenden que o ideal sería contar cun recinto de festas axeitado para ubicar este tipo de instalación, pero Tui carece desta infraestrutura e non a terá a medio prazo.