O PP de Pontevedra mobilízase para reelixir a Feijóo como presidente nacional

O presidente provincial do Partido Popular de Pontevedra, Luis López, destacou este martes a mobilización interna e o compromiso dos militantes da provincia no proceso de votación para o 21º Congreso Nacional do PP, cunha mensaxe clara: "Reelixiremos a Alberto Núñez Feijóo porque é a persoa máis preparada para rexenerar España tras o ‘sanchismo’ que está a triturar o país”.

Tras exercer o seu dereito a voto na mesa comarcal de Lalín, como militante do concello de Rodeiro, Luis López fixo fincapé na alta participación rexistrada nas 61 agrupacións locais, entre as que salientou a implicación das cinco agrupacións do Baixo Miño, que votaron na sede de Tomiño.

Na xornada estiveron presentes destacados cargos populares da comarca como os alcaldes da Guarda e Oia, Roberto Carrero e Cristina Correa; os voceiros municipais de Tui, Tomiño e O Rosal, Nico Montes, Mónica Otero e Carlos Rodríguez; así como a presidenta do PP de Tomiño e directora xeral de Xuventude, Lara Meneses.

Luis López sinalou que o PP “está preparado para cando Pedro Sánchez deixe de fuxir a ningures e convoque eleccións”, asegurando que o partido afronta este proceso “con estabilidade, solvencia e limpeza”, fronte a un PSOE en descomposición.

Tamén avanzou que a comarca do Baixo Miño contará con tres compromisarios dos 95 que representarán a Pontevedra no congreso que se celebrará en Madrid do 4 ao 6 de xullo. Asemade, criticou o “silencio clamoroso” dos cargos do PSOE na zona sur da provincia “fronte a unha situación de absoluto desgoberno e presunta corrupción de moita gravidade”.