O programa -Propulsa- da Xunta leva este venres a Tui o espectáculo -Leira- de nova galega de danza

O espectáculo Leira de Nova Galega de Danza chega este venres ás 21,00 horas á Praza San Fernando de Tui no marco do programa da Xunta Propulsa Danza+Paisaxe+Patrimonio. A iniciativa, posta en marcha este ano pola Consellería de Cultura, Educación e Universidade, busca poñer en valor a riqueza patrimonial e paisaxística de Galicia a partir das artes do movemento.

En Leira o corpo e a terra estreitan os seus lazos nun espectáculo de danza e música que transporta o público á dura beleza dos labores do campo, coa muller como centro desta conexión. Sucédense as xornadas e as estacións en crúas paisaxes de intemperies habitadas unicamente por unha coreografía humana de apeiros de labranza, de corpos que cargan e arrastran, que danzan entre os sucos arados na terra. Leira é tamén a sinxela alegría do traballo feito coas mans, coa valentía do corpo a corpo, a celebración dunha Galicia intemporal e máxica.

Con dirección artística e escenografía de Jaime Pablo Díaz, e coreografía de Iker Gómez, Rosa Cedrón ponlle a voz e música en directo ao espectáculo, xunto ás voces de Aida Tarrío e as percusións de Miguel Anxo López. A composición musical é de Sergio Moure de Oteyza. Antón Cabado é o responsable do deseño e a iluminación, Alberto Beade do son e Erica Oubiña do vestiario.

Espectáculos en 27 espazos singulares

Propulsa Danza+Paisaxe+Patrimonio arrincou o pasado 2 de xullo en Ribadeo e rematará o 29 de agosto en Ponteareas, tras percorrer 27 espazos singulares de toda Galicia. Participan 30 formacións artísticas, das que 23 son galegas e sete proceden doutros puntos de España, de Francia e de Portugal.

O obxectivo é achegarlle ao público unha nova maneira de ver a danza, mediante a mestura desta arte escénica co patrimonio e a paisaxe de diferentes espazos singulares do territorio galego, como praias, cabos, fragas, fervenzas, miradoiros, catedrais, museos, hórreos ou castros.

Deste xeito, Propulsa Danza+Paisaxe+Patrimonio permite levar a danza a concellos onde esta disciplina artística non soe formar parte das súas programacións culturais, ao tempo que sirve de promoción turística de lugares singulares. Ademais, búscase fomentar a creación contemporánea de danza e atraer novos públicos, xunto coa creación de sinerxías coas administracións locais e os tecidos asociativos de cada zona.

A iniciativa insírese na colaboración entre a Consellería de Cultura, Educación e Universidade e Turismo de Galicia para o desenvolvemento de diferentes propostas culturais no marco do Xacobeo 21-22.