OS PREMIOS ESCOLARES -SEPAREMOS BEN, RECICLAREMOS MELLOR- RECAEN NOS COLEXIOS AS SOLANAS DA GUARDA E NOSA SEÑORA DA ASUNCIÓN DE SARRIA

O xurado, formado por portavoces das entidades que impulsan e cooperan nesta iniciativa, valorou que os traballos e axustaran ao obxectivo de informar, formar e concienciar á poboación galega na mellor xestión dos residuos urbanos, perseguindo con isto o incremento das taxas de reciclado na comunidade galega.

O centro de Baiona foi premiado polo seu traballo Segunda vida- Don Quixote. Os estudantes de terceiro curso de primaria deste centro decidiron realizar, entre outras actividades, unha específica sobre a recollida selectiva. Para isto debuxaron sobre uns grandes cartóns as personaxes da novela máis destacada da literatura española universal (D. Quixote, Dulcinea, Sancho Panza e un muíño de vento) adxudicando a cada un deles un contedor específico.

A D. Quixote tocoulle o amarelo, destinado a albergar os envases de plástico, as latas e os briks; a Dulcinea, o azul, para os envases de cartón e papel; a Sancho Panza, o verde convencional, que acolle a fracción resto; e ao muíño de vento, o iglú verde, para a recollida de envases de vidro. A posteiori, puxeron diante de cada un deles unha caixa de cartón, axustando na mesma unha bolsa da mesma cor.

Por último, uniron as personaxes facendo unha estrutura de cubo e de cuxo centro emerxeu unha árbore chea de lixo que espera a súa segunda vida. A súa obra de arte preside a entrada do colexio. O Xurado valorou positivamente a conexión entre as boas prácticas en materia de reciclaxe e o mundo da literatura que os alumnos trasladaron coa materialización desta actividade. Na imaxe, o traballo realizado polos alumnos do Colexio As Solanas.

No caso de secundaria, o recoñecemento recaeu no colexio plurilingüe Nosa Señora da Asunción de Sarria (Lugo), pola presentación do traballo Abre os ollos, co que se pretendía representar a realidade do mundo no que vivimos, así como os actos que inconscientemente acentúan a súa destrución.

Nese sentido, o obxectivo da iniciativa é poñer de relevo a importancia que ten sensibilizar á cidadanía en torno á correcta xestión dos residuos urbanos.

Caixas de cartón, recortes de cartolinas e folios usados noutros traballos, ademais de botellas de plástico recortadas e moldeadas con calor para fabricar as follas da árbore, e recortes de caixas de aluminio coas que se plasmaron as fábricas e a estrada, constitúen exemplos dalgúns dos materiais reutilizados nesta iniciativa.

Os mozos tamén recolectaron paus, herbas e pedras para compoñer o tronco da árbore e o chan, así como tapóns e recortes de cartolina para simular a contaminación e as flores. Naq imaxe, o mural realizado polos alumnos de secundaria do colexio de Sarria.

Como premio polos traballos presentados e destacados, ambos centros recibiron senllos vales por un importe de 700 euros, canxeables por material didáctico e escolar. Asemade, os estudantes autores das representacións (tres alumnas de primaria e outras tres de ESO), fixéronse cada unha delas cun e-book, no caso de primaria, e unha mini-tablet, no caso de secundaria.

Tamén houbo recompensa para os segundos e terceiros traballos nas mesmas categorías. No caso de primaria, Vivimos como abellas, presentado polo CEIP Sobreira- Valadares no Concello de Vigo acadou o segundo premio e O meu organizador, presentado polo centro de ensino de Ferrol, Almirante Juan de de Lángara e Huarte, foi distinguido co terceiro premio. Triángulo de Sierpinski do IES de Beade e Termo do IES da Pobra do Caramiñal, acadaron o segundo e terceiro premios, respectivamente, na categoría de ensino secundario.

Esta convocatoria de premios foi lanzada a finais do pasado ano, dirixiuse a todos os centros galegos de primaria e secundaria, encomendándolles a elaboración de obras de arte a partires de materiais de refugallo. Con isto, e máis aló de que os seus alumnos puideran comprobar por si mesmos as múltiples aplicacións e posibilidades deste tipo de materiais, pretendíase dar renda solta á súa imaxinación, á vez que se apostaba pola innovación.