Paloma Castro considera prioritario abrir á mocidade o PSdeG na provincia de Pontevedra

Paloma Castro, candidata á Secretaría Xeral do PSdeG na provincia de Pontevedra, propuxo hoxe reforzar as políticas cara á mocidade no seo do PSdeG da provincia de Pontevedra para atraer a xente nova ao partido.

“É prioritario abrir o PSdeG na provincia de Pontevedra á mocidade”, sentenciou a socialista, despois de manter, no marco dos encontros da campaña de Primarias, unha xuntanza con mozas e mozos do partido na provincia.

“É imprescindible atraer á xente nova ao partido para ampliar e renovar a nosa base social”, sinalou. “Temos que conseguir atraer á mocidade e converter ao PSdeG nun referente que loita polos seus dereitos”, incidiu, e para iso “temos que preocuparnos máis polos seus problemas e darlles respostas”.

Así, a candidata socialista sinalou que “o principal problema da xente nova é a falla de posibilidades de futuro en Galicia que lles obriga a ter que emigrar a outros territorios para poder buscar un futuro mellor, unha cuestión que é intolerable e temos a obriga de reverter”, destacou.

“TRABALLAR POR COMBATER A PRECARIEDADE”

“É fundamental priorizar as políticas de emprego e traballar por combater a precariedade, a temporalidade e mellorar os salarios para dar condicións de futuro dignas aos nosas mozas e mozas, xa que teñen dereito a desfrutar dunha vida plena tamén na nosa terra”, sentenciou.

Nesta liña, Castro pediu tamén abordar as políticas de vivenda como prioridade, enfocadas para facilitar o acceso á vivenda ou ao aluguer, xa que “agora mesmo a situación impide que a mocidade poida independizarse”. “Só un 18% das mozas e mozos viven emancipados das súas familias, o cal está moi lonxe dos datos doutros países europeos”, destacou.

Ao fío disto, a socialista tamén urxiu unha aposta pola educación pública de calidade, tanto a través da “potenciación” da formación universitaria como do desenvolvemento dos sistemas de Formación Profesional que permitan “darlle futuro” a xente nova.

OS SUICIDOS ENTRE A XENTE NOVA, UN “GRAVÍSIMO” PROBLEMA QUE “DESTAPOU A COVID”

Por último, Castro amosou a súa preocupación polo “enorme incremento” do número de suicidios entre a mocidade, que “xa son a principal causa de morte da xente nova no noso país” na franxa de idade de 15 a 29 años, segundo os datos do INE. “A pandemia destapou un gravísimo problema na nosa sociedade no que temos a obriga de traballar dende PSdeG”, concluíu.