Tui honra os Xogos Florais de 1891 cun espectáculo poético-musical e recoñecemento á primeira novelista galega

O Concello de Tui conmemora esta semana o 134 aniversario dos Xogos Florais de Galicia, o primeiro acto público celebrado integramente en lingua galega na época contemporánea. A cita histórica, que tivo lugar no Teatro Principal de Tui entre o 24 e o 26 de xuño de 1891, será recordada a través de dúas actividades culturais programadas para os días mércores 25 e xoves 26 de xuño.

O mércores 25, o Espazo Sociocultural da rúa Camilo José Cela acollerá o espectáculo “Cintaadhesiva”, unha proposta poético-musical creada pola poeta Silvia Penas e o músico Jesús Andrés Tejada. Esta actuación fusiona poesía, música, videoarte e escénica nun formato pensado para o directo, cun enfoque artístico onde os textos non son acompañados por música, senón integrados nela.

O xoves 26 de xuño, a programación centrará a súa atención na figura de Francisca Herrera Garrido (1869-1950), primeira muller en publicar unha novela en galego e en formar parte da Real Academia Galega. A homenaxe celebrarase na praza do Pracer, diante da casa da familia Areal, onde a autora pasou longas tempadas.

Durante o acto presentarase o libro “Obra en galego de Francisca Herrera”, editado polo seu sobriño neto José Leoncio Areal e coa colaboración da catedrática Camiño Noia, que estarán acompañados por alumnado do Conservatorio Municipal de Música de Tui. Como peche, descubrirase unha placa conmemorativa na vivenda que albergou á escritora durante as súas estadías en Tui.

Estas actividades recuperan o espírito dos Xogos Florais de Galicia, celebrados en Tui en 1891, organizados pola Asemblea Rexionalista Galega e considerados un fito na reivindicación da lingua e cultura galegas. Aquel evento contou coa participación de figuras como Manuel Murguía, Salvador Cabeza de León e Alfredo Brañas, así como destacados representantes locais.

O primeiro discurso público de Murguía en galego, os concursos de gaiteiros, os actos litúrxicos e culturais da época, así como as intervencións dos membros da Xunta Rexionalista de Tui, forman parte da memoria colectiva que o Concello quere preservar e difundir con esta programación.