Un total de 9 mozas e mozos se formarán no Baixo Miño a través do plan de práctica laboral da Deputación de Pontevedra

Dúas persoas traballarán en A Guarda, unha en O Rosal, tres en Tomiño e tres en Tui. Os graos máis demandados no Baixo Miño foron Historia, Enxeñaría de Edificación, Ciencias da actividade física e do deporte, Grao en Ciencias Políticas, Traballo Social, Ciencias Ambientais, Enxeñaría de Obras Públicas, Xornalismo e Dirección e Xestión Pública. En canto aos ciclos formativos, aqueles de maior demanda foron Administración e Finanzas, Animación Sociocultural, Guía e Información Turística e Producción Audiovisual.

En total, o Plan de Práctica Laboral permitirá que un total de 146 mozos e mozas se beneficien este ano desta iniciativa: 105 estarán en 57 concellos da provincia e 41 realizarán as súas estadías laborais na Deputación de Pontevedra. Nos servizos da Administración provincial, as prácticas laborais desenvolveranse no Centro Príncipe Felipe, no Museo de Pontevedra, nos Servizos Lingüísticos, en Medio Ambiente, na Finca Mouriscade, na Estación Fitopatolóxica do Areeiro, en Arquitectura, en Comunicación Institucional, en Novas Tecnoloxías, en Cooperación, en Asistencia Intermunicipal, en Cohesión Social e Xuventude, en Promoción do Emprego e en Turismo Rías Baixas.

O obxectivo desta iniciativa é que mozos e mozas da provincia con titulacións universitarias ou ciclos superiores de formación profesional accedan a estadías laborais en concellos e na Deputación para mellorar e acrecentar a súa experiencia laboral. Este ano, os bolseiros e bolseiras con titulación universitaria percibirán 840 euros ao mes e as persoas de ciclos superiores de formación profesional recibirán 740 euros ao mes, 40 euros máis que en 2017.