VENCE: -TOMIÑO É EXEMPLO DE GOBERNO HONESTO, EFICAZ E PARA A XENTE, UN CONCELLO DE REFERENCIA NA COMARCA-

"Onde goberna o BNG, a foto sempre sae bonita", sintetizou o dirixente nacionalista, "porque son concellos honestos, dinámicos, con servizos públicos de calidade e pensados para darlle calidade de vida ás persoas", alegou. "Con aval deste traballo feito, serán moitos máis os concellos gobernados por BNG-Asembleas Abertas a partir do 24 de maio".

Vence fixo especial fincapé na "transparencia e honradez" do goberno que encabeza a candidata Sandra González, "sempre ao lado da xente, como demostrou cos miles de afectados e afectadas polo roubo das preferentes, que tivo no Baixo Miño case a zona cero desta estafa". "O PP do resto dos concellos da comarca mirou para outro lado, como fixo Feijóo na Xunta, Sandra non, o BNG non, estivo ao lado das persoas estafadas, na rúa e desde as institucións".

O dirixente nacionalista enumerou os logros do goberno nacionalista, que ten dotado Tomiño de servizos públicos, "que para si quixeran moitas cidades", -citou as escolas infantís, o centro de día, a escola de música-, e a capacidade para xerar actividade económica na localidade, coa remodelación da praza de abastos como emblema.

Redobrar esforzos

Vence instou a todos os candidatos e candidatas, militantes e simpatizantes a redobrar esforzos nesta semana final de campaña "porque nos sobran motivos para convencer a toda a xente indecisa de que BNG-Asembleas Abertas é a alternativa ao PP en todo o país, onde lle disputamos terreo palmo a palmo".
"Moita xente é consciente e aprecia que alí onde goberna o BNG os concellos son transparentes e honestos, capaces de dinamizar o tecido económico local, comprometidos coa cultura e coa xente moza", e avanzou que o proxecto nacionalista "vai ter presenza en todas as corporacións e o goberno de moitas alcaldías importantes na nosa nación", superando "con creces" as expectativas das enquisas.