ÁNGEL BAZ: É POSIBLE CAMBIAR AS COUSAS E PARA ISO É PRECISO CONTAR CON TODAS AS PERSOAS QUE VEN QUE AS POLÍTICAS SEGUIDAS NOS ÚLTIMOS ANOS NON SERVIRON PARA CREAR O CONCELLO QUE DESEXAMOS

“Fronte a unha situación difícil como a que estamos a vivir, na que é doado caer na desesperanza de que as cousas non poden mudar, o BNG Asembleas Abertas fai un chamamento claro e directo a todas aquelas persoas que cren que outro xeito de facer as cousas é posible. Despois de anos repetindo fórmulas que non fixeron máis que perpetuar os vellos problemas da Guarda, despois de anos repetindo incesantemente que nada se pode facer, que o que temos é o mellor ao que podemos aspirar, chegou o momento de sumar as forzas de todas as persoas que saben que na Guarda se pode aspirar a moito máis do que tivemos até o de agora.” Con estas declaracións facía referencia Ángel Baz á campaña que leva desenvolvendo estes días o BNG-Asembleas Abertas.

Chegando xa ao final da campaña electoral, o BNG Asembleas Abertas convoca este xoves a partires das 20h. un acto público festivo na Praza de San Caetano co que pechar a rolda de actos, charlas e reunións que tiveron lugar nas últimas semanas.

“Vendo a ilusión e ánimo coa que está sendo recibida esta candidatura pensamos que non hai mellor maneira de pechar esta serie de actos que cunha foliada popular na que compartir a alegría que se nos está a transmitir” comentou Ángel Baz.

Dende o BNG-Asembleas Abertas manifestan percibir que a veciñanza está desexando ver, dunha vez por todas, os cambios que o concello precisa para deixar de esmorecer e converterse nunha vila próspera, con actividade e na que é posible vivir dun traballo digno.

Realmente o que a Guarda precisa é que se poñan todos os seus recursos ao servizo do pobo e para iso é necesario ter a vontade política de facelo. Ese é o compromiso do BNG-Asembleas Abertas; sabemos que é posible, sabemos que é necesario e estamos dispostos a facelo afirmou o candidato.

O BNG-Asembleas Abertas considera que estas eleccións municipais supoñen un punto de inflexión no que A Guarda ten a oportunidade de tomar o timón do seu destino e comezar, de xeito colectivo, unha nova etapa na que A Guarda e as guardesas e guardeses poidan desenvolver, por fin, toda a súa potencialidade.

Chegou o momento dos que cremos que outra Guarda é posible, chegou o momento das persoas que de verdade queren transformar este concello: Fagámolo. concluíu Ángel Baz.