A Deputación activa tres liñas de axudas para poñer en valor o patrimonio marítimo-fluvial da provincia

A Deputación de Pontevedra vén de aprobar as bases dunha nova convocatoria de axudas dotada con 90.000 euros, destinada á recuperación e posta en valor do patrimonio marítimo-fluvial da provincia.

O presidente provincial, Luis López, destacou que “temos un patrimonio único no mundo e aquí estamos, dando resposta aos colectivos, con liñas de axudas encamiñadas a conservar algo que tanto nos identifica e tanto fala de nós como pobo”.

Tres liñas de actuación

As achegas estarán distribuídas en tres modalidades:

• Rehabilitación de embarcacións tradicionais.

• Recuperación de aparellos de pesca e elementos vencellados á cultura marítimo-fluvial.

• Posta en valor de construcións e instalacións en terra.

Cada proxecto poderá optar a unha achega máxima de 10.000 euros, sempre que non supere o 80% do orzamento total da actuación.

Prazo de solicitude

As entidades sen ánimo de lucro interesadas disporán dun mes de prazo para presentar solicitudes, contado a partir do día seguinte á publicación da convocatoria no Boletín Oficial da Provincia (BOPPO).

Segundo recordou López, “no pasado Pleno o BNG demandaba sacar adiante esta liña de axudas, pese a saber que o procedemento xa estaba avanzado e ía a trámite nesta Xunta de Goberno”.

Con esta iniciativa, a Deputación busca preservar o patrimonio marítimo-fluvial da provincia de Pontevedra, un legado cultural e identitario que forma parte esencial da historia e da vida mariñeira da comunidade.