A DEPUTACIÓN DE PONTEVEDRA DESTINA UN 20,5% MÁIS DE RECURSOS PARA O FOMENTO DO EMPREGO

Esta aposta xa se comezou a materializar coa posta en marcha dun departamento propio denominado Servizo de Promoción de Emprego e Desenvolvemento Local, ata o momento inexistente, cuns fins diferentes ó Servizo de Recursos Humanos e Formación. Este departamento aglutina accións de formación e inserción/integración sociolaboral coa finalidade de paliar as necesidades das persoas máis vulnerables, tratando de eliminar a precariedade laboral e impulsando o traballo de calidade, que respecte ós traballadores e garanta unhas dignas condicións económicas. Pero o servizo tamén está a impulsar as prácticas laborais e as axudas para a creación de empresas, dando un forte apoio á formación e incorporación cualificada ó mercado de traballo. Así, a través deste servizo xa se puxeron en marcha iniciativas como o "Depoemprega 2015", iniciado o paso mes de outubro, que ten por obxectivo mellorar a empregabilidade e poder acadar a inserción laboral dos seus participantes, o "Practicum Depo 2015", que impulsa as prácticas laborais no estranxeiro, ou obradoiros de emprego dirixidos a mozas e mozos menores de 25 anos.

O novo Servizo de Promoción de Emprego e Desenvolvemento Local terá, no 2016, un orzamento de preto de 4 millóns de € que se complementarán cos preto de 3 millóns de € que o novo goberno da Deputación de Pontevedra destinará ó Servizo de Recursos Humanos e Formación. Así, as dúas partidas destes centros xestores de fomento e promoción do emprego suman preto de 7 millóns de € no orzamento provincial do 2016 ós que, ademais, é necesario engadir os 9 millóns de € destinados ó fomento do emprego nos concellos da provincia.

Polo tanto, a Deputación de Pontevedra destina, no novo orzamento, un total de 15,3 millóns de € para o fomento do emprego (o 10% do gasto) e da formación como instrumento máis eficaz para impulsar a empregabilidade. En resumo, destinarase para o 2016 un 20,5 % máis de recursos que os destinados para o 2015, cando o investimento en fomento de emprego era de 12,7 millóns de €.

Durante o 2016, a Deputación de Pontevedra contempla outorgar axudas ós investigadores e innovadores e contribuír nas bolsas das e dos estudantes universitarios dos campus de Pontevedra e Vigo, para que todas e todos teñan acceso ás estancias noutros países de Europa durante un curso en igualdade de condicións. Tamén se impulsará un protocolo de actuacións para os vindeiros catro anos, coa Universidade de Vigo, coa finalidade de traballar conxuntamente compartindo experiencias e coñecemento.