A Mesa repasa a situación do galego e anima a que o voto conte a favor da lingua de Galiza

"Todos os datos amosan como o uso do galego está a diminuír a un ritmo alarmante, que só se comprende ao vermos como a posibilidade real de uso do galego está claramente limitada na práctica". En moitas ocasións, sinalan desde A Mesa, "coa participación dos poderes públicos, a través da difusión de prexuízos contra o galego ou con accións lexislativas, como se ve no caso do ensino onde o decretazo prohibe o galego nas matemáticas, nas ciencias ou na tecnoloxía; ou na administración pública onde está practicamente ausente de organismos como a Axencia Tributaria ou a Seguridade Social".

O vídeo presentación repasa ademais as modificacións lexislativas en ámbitos como o ensino, e as críticas reiteradas por parte de organismos como o Consello de Europa ao mal chamado decreto de plurilingüísmo.

Reflectir a mobilización social a favor do galego no voto

"Os últimos anos foron de mobilización da sociedade a favor do noso idioma. O 25 de setembro cómpre que esa mobilización se reflicta nas urnas votando polas opcións políticas comprometidas coa reposición da lingua galega", sinalou o presidente da Mesa pola Normalización Lingüística. Precisamos un goberno favorábel a Galiza e que polo tanto defenda a súa maior creación colectiva, o idioma.

A entidade social a favor do galego, xa remitiu aos principais partidos que concorren a este proceso electoral, unha batería de 6 medidas extraídas do Plan Xeral de Normalización da Lingua Galega, aprobado en 2004 por unanimidade parlamentar, mais cuxa aplicación, 12 anos despois, aínda é unha tarefa pendente.

"Non é máis que unha batería de propostas aparentemente asumidas por todas as forzas políticas e sociais, moitas xa recollidas en acordos nacionais como o Plan Xeral de Normalización da Lingua Galega ou en tratados internacionais como a Carta Europea das Linguas Rexionais e Minorizadas" sinalou o presidente da Mesa pola Normalización Lingüística.

"Temos como punto de partida a Carta Europea e o Plan Xeral de Normalización da Lingua Galega, aprobado por unanimidade, cuxa elaboración contou coa participación de case 1000 persoas representativas de todos os sectores sociais, de todas as ideoloxías e tendencias, con 445 medidas concretas, das cais, consideramos que 6 se poden comezar a aplicar de xeito inmediato, e máis cando todos os estudos demostran que é urxente facelo", engadíu.

Para a entidade en defensa do idioma galego, asumir a aplicación inmediata destas 6 medidas é a mellor maneira de demostrar verdadeira intención de cumprir co acordado no Plan Xeral de normalización da Lingua Galega, ratificado por todas as forzas políticas na Declaración de Unidade a prol da Normalización da Lingua Galega asinada coa Mesa por grande parte das forzas políticas que participarán no proceso de elección do novo Parlamento de Galiza.

Estas medidas reclaman, a recuperación do papel normalizador da CRTVG, un plan de choque para recuperar o galego no ensino, accións claras e concretas no ámbito das administracións públicas incluíndo xustiza e saúde, os transportes públicos, acordos para a recepción mutua do sinal da Radio Televisión Portuguesa e a TVG, e o condicionamento das axudas públicas á utilización da lingua galega.