A XUNTA ACLARA QUE É FALSO QUE A LEI DE MONTES DO ESTADO ABRA A PORTA Á RECUALIFICACIÓN INDISCRIMINADA DE TERREOS QUEIMADOS

Só “con carácter singular” faculta ás comunidades autónomas a excepcionar esta prohibición sempre que con anterioridade ao incendio forestal estivera previsto o cambio:

-nun planeamento previamente aprobado,
-nun instrumento de planeamento pendente de aprobación sempre que xa fora obxecto de informe de avaliación ambiental favorable ou –de non ser este último esixible- se xa fora sometido ao trámite de información pública
-nunha directriz de política agroforestal que contemple o uso agrario ou gandeiro extensivo de montes non arborados en estado de abandono.

Tamén con carácter excepcional, as comunidades autónomas poderán acordar o cambio de uso forestal “cando concorran razóns imperiosas de intereses público de primeira orde que deberán ser apreciadas por Lei e sempre que se adopten as medidas compensatorias necesarias que permitan recuperar a superficie forestal equivalente á queimada”. “No caso de que esas razóns imperiosas de primeira orde correspondan a un interese xeral da Nación, será a lei estatal a que determine o cambio de uso forestal” e en ningún caso se poderá excepcionar a norma respecto de montes catalogados, caso –por exemplo- do recente conato na illa de Cortegada ou dos lumes rexistrados na Serra do Xurés.

É dicir, é radicalmente falso que a Lei de Montes do Estado permita especular urbanisticamente con terreos forestais e que abra a porta á recualificación indiscriminada antes de 30 anos tras un incendio. A nova Lei, só contempla a recualificación nos casos nos que ese procedemento estivera xa aprobado ou en marcha ANTES do incendio forestal ou sempre que se faga contemplando o seu uso agrario ou gandeiro. Ademais só se permite cambiar o uso forestal se por lei, a Comunidade Autónoma correspondente, declara razóns imperiosas de interese público de primeira orde (como por exemplo unha obra pública coma o trazado da alta velocidade).

Nesta liña, a Xunta lamenta profundamente que se estea a facer un uso partidista, sesgado e demagóxico da Lei intentando vinculala á actividade delictiva incendiaria que se está a rexistrar en Galicia trasladando unha mensaxe falsa e interesada á cidadanía con fins que se afastan da verdade.

Dispositivo
Respecto das críticas os dispositivo, convén lembrar que Galicia conta co dispositivo de prevención e loita contra incendios forestais máis potente de toda España que, en conxunto, pode chegar a acadar as 7.000 persoas velando polos montes galegos. Un dispositivo idéntico en persoal que o ano anterior, polo que é rotundamente falso que haxa unha redución en máis dun terzo, como se asegura desde determinados sectores. Ademais, e tal e como estaba previsto, ao comezo da campaña de risco elevado –o 1 de xullo– estaban xa cubertos o 100% dos postos de técnicos, o 98,1% dos 388 postos de axentes e o 94% dos 1.839 postos de laborais do Servizo de Prevención e Defensa Contra os Incendios Forestais (SPDCIF) da Xunta de Galicia. Polo tanto, as vacantes están a ser cubertas en tempo e forma.