A Xunta defenderá no grupo de traballo a súa proposta para mellorar o mapa de emerxencias en Galicia

A Xunta de Galicia defenderá no Grupo de Traballo para a xestión das emerxencias, que se reúne este martes, a súa proposta para mellorar o mapa de emerxencias en toda Galicia. A Administración autonómica ten previstas varias vías para reducir aínda máis os tempos de resposta e eliminar as zonas de sombra.

Por un lado, a comarcalización dos parques de bombeiros das grandes cidades, co que se pretende conseguir un sistema profesional máis racional fronte ás emerxencias que se puideran producir nos concellos beneficiados pola medida. Os tempos de resposta situaríanse neses municipios en torno aos 20 minutos e os medios que actuarían sería sempre os mais próximos ao lugar onde se produce a emerxencia.

Ademais da comarcalización dos parques de bombeiros das grandes cidades, para mellorar os tempos de resposta e eliminar as zonas de sombra que aínda quedarían activas, está prevista a creación de novos servizos, na maior parte dos casos Grupos de Emerxencias Supramunicipais (GES), cunha dimensión adecuada tendo en conta cada caso específico

Estas propostas xa foron avanzadas na última reunión do grupo de traballo polas emerxencias e foron remitidas aos seus membros para analizalas polo miúdo na xuntanza que terá lugar mañá martes. Para poder materializalas será necesario que as deputacións provinciais, que, segundo a Lei de emerxencias, son as administración competentes para prestar servizo aos concellos de menos de 20.000 afectados, colaboren activamente no financiamento.