A Xunta impulsa a instalación de 1.400 novas caldeiras de biomasa a través de catro convocatorias de axudas

O presidente da Xunta, Alberto Núñez Feijóo, avanzou hoxe na rolda de prensa do Consello a instalación de 1.400 novas caldeiras de biomasa, a través de catro convocatorias de axudas cuxo orzamento conxunto supera os 11,7 millóns de euros.

En primeiro lugar, Feijóo referiuse ás axudas para a instalación de caldeiras para particulares que residan en zonas rurais -que publica hoxe o DOG-, cunha subvención do 50% da instalación ata un máximo de 50.000 euros. Esta liña primará os equipos máis eficientes, os máis económicos e as solicitudes que proveñan dos municipios con menor nivel de renda, coa previsión dun aforro total de preto de 600.000 euros ao ano.

A segunda axuda, que se prevé que se publique ao longo deste mes, impulsará a instalación de caldeiras en empresas, entidades sen ánimo de lucro e Administracións públicas. E como novidade, esta convocatoria incrementa nun 5% a porcentaxe de axuda cando a solicita unha empresa: 70% para a pequena empresa, 60% para a mediana empresa e 50% para a gran empresa.

A terceira liña de axudas destinada á instalación de sistemas de calefacción baseados na biomasa, coñecidos como district heating, e cuxa orde no DOG se prevé que sexa publicada o mes que vén, tamén incrementa a cofinanciación coa mesma intensidade. E a cuarta e última axuda, destinada a fomentar o uso de enerxías renovables no sector agroalimentario prevese tamén que se publique no mes de abril.

Durante a rolda de prensa, Feijóo subliñou que sumando as previsións deste ano cos resultados dos tres anos anteriores, estímase que estas iniciativas permitirán a instalación de 4.000 caldeiras, cunha mobilización dun investimento de 51 millóns de euros e un aforro de 20 millóns de litros de gasóleo ao ano.

O presidente da Xunta afirmou que isto encádrase na Estratexia integral de impulso á biomasa con fins térmicos, presentada hai tres anos e articulada en torno a catro eixos fundamentais: incrementar a demanda; impulsar a innovación tecnolóxica; garantir a calidade e a orixe, certificando mediante o selo Galicia Calidade os pellets e estelas galegas de biomasa; e levar a cabo accións de formación e divulgación a través do Foro da Biomasa.

Feijóo concluíu lembrando que o sector da biomasa en Galicia segue a fortalecerse. Non en van, hoxe hai 9 plantas abertas -coa previsión doutra nova este ano- que producen 200.000 toneladas anuais de pellets e estelas, e xeran 100 postos de traballo directos e 200 indirectos. Ademais, lembrou que o edificio de San Caetano xa se quenta con biomasa desde o pasado mes de decembro; e tamén que varios centros hospitalarios públicos e varias sedes xudiciais galegas empregan a biomasa.

Infórmate en: