A XUNTA INVISTE MÁIS DE 100.000 EUROS NA MELLORA DAS INFRAESTRUTURAS DOS CONCELLOS DE TOMIÑO, TUI, CATOIRA E A CAÑIZA

O concello de Tomiño recibirá 20.000 euros para a mellora da accesibilidade a distintos núcleos de poboación e Tui 35.000 para a ampliación e remodelación da zona de xogos infantís que se atopa no paseo marítimo do municipio. Mediante o último convenio, o de Catoira, a Xunta achegará 25.000 euros para o acondicionamento das dependencias da nova Casa Consistorial.

Estes convenios asínanse ao abeiro dunha orde de subvencións da Vicepresidencia, para a creación e/ou mellora das infraestruturas, dotacións, instalacións e equipamentos vinculados á prestación de servizos municipais destinadas a concellos galegos en 2015; que esta cofinanciada polo Fondo Europeo Agrícola de Desenvolvemento Rural (FEADER), no marco do Programa de Desenvolvemento Rural de Galicia.

Este programa, ao igual que a Xunta de Galicia, ten entre as súas prioridades "a mellora da calidade de vida nas zonas rurais" e por iso o Goberno galego decidiu apoiar economicamente a aquelas actuacións cuxo obxectivo sexa mellorar as infraestruturas e equipamentos de uso público e, por tanto, dos servizos municipais que os concellos prestan aos seus veciños e veciñas.

As actuacións subvencionables baixo esta orde eran proxectos de construción, mellora, ampliación ou rehabilitación de espazos públicos -prazas, paseos, rúas, parques públicos e parques infantís-; edificios ou dependencias municipais destinados á prestación de servizos administrativos; e instalacións deportivas de uso público; así como as súas respectivas dotacións de equipamentos. Ademais, tamén eran subvencionables as instalacións, ampliacións e melloras das redes de alumeado público e a pavimentación de vías municipais que non estean incluídas no programa de mellora de camiños do concello beneficiario.

A Cañiza
Tras esta sinatura, o director xeral de Administración Local desprazouse ata A Cañiza, onde asinou un cuarto convenio cofinanciado con Fondos Feader, polo que a Xunta lle vai achegar ao concello máis de 35.000 euros para a instalación de cubertas nos campos de fútbol de Randufe e O Couto e a megafonía do pavillón de deportes municipal.

Tal e como se recolle na memoria xustificativa do Concello, esta actuación considerase moi necesaria xa que protexerá ao público das inclemencias do tempo e mellorará unhas instalacións ás que acoden moitos veciños e veciñas, que demandaban maior calidade no servizo.