A XUNTA RECOÑECE A REGULARIZACIÓN DO NÚCLEO TRADICIONAL LITORAL DAS EIRAS NO ROSAL

En concreto, os núcleos que obtiveron o recoñecemento foron A Bornale-O Cruceiro , Surribos, A Viña, A Robaleira e Valdexería en Muros; Rocamar en Baiona; A Golada e Prado-Patos, en Nigrán; Aguete Sur, Loira, Teoira e Casás, en Marín; Castro en Gondomar e As Eiras no Rosal.

Hai que ter en conta que na actualidade o Magrama ten pendente de resolver as solicitudes presentadas por 11 concellos (de 46 presentados): Arteixo, Neda, Valdoviño, Barreiros, O Vicedo, Viveiro, A Guarda, Cangas, Oia, Poio e Redondela. E hai outros oito que presentaron alegacións tras emitir o seu informe o Ministerio e polo tanto, aínda non está pechado expediente: Ares, Boiro, Illa de Arousa, O Grove, Poio, Sanxenxo, Vilaboa e Vilanova de Arousa. Polo tanto aínda quedarían 19 concellos pendentes dunha resolución definitiva para os seus núcleos.

Segundo explicou esta mañá en comisión parlamentaria a secretaria xeral de Ordenación do Territorio e Urbanismo, desde a Xunta lévase traballando de longo nunha demanda histórica a prol do recoñecemento de que o solo de núcleo rural propio da idiosincrasia galega sexa asimilable na clase básica estatal de solo urbano.

Neste sentido, Encarnación Rivas destacou o labor desenvolvido pola Xunta no que respecta ao asesoramento e a implicación con todos aqueles concellos tal e como solicitaron xa Arteixo e Boiro, e as numerosas reunións coa Dirección Xeral de Costas en Madrid, co obxectivo de que o Goberno español entendese e recoñecese a verdadeira situación da costa galega. Precisamente, neste mes de setembro foron dúas as reunións mantidas co departamento ministerial. Na máis recente, desenvolvida o pasado venres, coa subdirectora xeral de Costas, deuse conta do resultado provisional deste proceso.

Segundo explicou a secretaria xeral, algúns concellos esperaron a maio deste ano –o 31 de maio expiraba o prazo- para presentar as solicitudes, polo que ata finais de 2016, non se poderá saber o resultado de todas, xa que o prazo de resolución é de 18 meses.

Regularización na Lei de Costas
A Lei de Costas aplicaba un réxime de limitacións na zona de servidume de protección establecida en 20 metros no solo urbano e en 100 metros fóra del, o que provocaba que moitas das edificacións existentes en solo de núcleo rural do litoral quedasen nunha situación que se considera fóra de ordenación.

A Xunta sempre defendeu a singularidade e peculiaridade de Galicia para facer compatible os núcleos tradicionais da costa coa protección do litoral. Grazas ao traballo conxunto realizado entre Xunta e Goberno central logrouse que a nova lei de costas recollese, por primeira vez, unha vía para resolver unha demanda histórica e propiciar que os núcleos tradicionais costeiros puidesen ser regularizados.

Este camiño pasa por rebaixar a zona de servidume de costa dos 100 aos 20 metros, para todos aqueles municipios que demostren a existencia consolidada dos núcleos urbanos con anterioridade á Lei de Costas de 1988. Así, pois, para que os núcleos costeiros tradicionais poidan contar con este amparo legal, os concellos debían acreditar correctamente a preexistencia deses núcleos.

Desde a Xunta deféndese que a mellor fórmula para acadar seguridade xurídica pasa por procurar a regularización dos núcleos afectados e das súas vivendas a través dos Plans Xerais de Ordenación Municipal (PXOM). Por este motivo, insístese na necesidade de axilizar a redacción dos planeamentos naqueles concellos que teñen este tipo de problemas.

Neste sentido, Encarnación Rivas destacou que a clave do éxito dos municipios que acadaron a regularización foi que souberon definir un bo plan xeral e que traballaron desde a máxima transparencia e coa máxima lealdade institucional. “Contar co planeamento non é o único método para alcanzar a regularización dos núcleos tradicionais do litoral, pero si é a fórmula que ten probado a maior eficacia e que a Xunta apoia”, salientou.

A ese respecto, a secretaria xeral salientou que os municipios que non regularicen a situación dos núcleos ao abeiro da disposición transitoria da Lei de Costas, seguen tendo á posibilidade de facelo a través do Plan Xeral de Ordenación Municipal, para o que poderán contar coa colaboración do Goberno galego.