A XUNTA REDUCE DE 6 MESES A 15 DÍAS O PERÍODO DE TRAMITACIÓN PARA AUTORIZAR LIMPEZAS DE RÍOS CO FIN DE OPTIMIZAR O ESTADO ECOLÓXICO DAS CANLES E EVITAR ASOLAGAMENTOS

Coa nova normativa só será necesario que o particular ou administración local correspondente comunique con 15 días de antelación as tarefas a executar a Augas de Galicia. Trátase dunha axilización fronte aos trámites actuais, que se traducen nunha duración de entre 4 e 6 meses por expediente. A día de hoxe, realizar este tipo de actuacións precisa unha presentación da solicitude, especificando o tramo e os traballos de limpeza, visita da gardería, informes técnicos e proposta-resolución.

A simplificación no procedemento fomenta a vontade para mellorar os leitos da Demarcación Galicia-Costa, xa que a actual xestión provocaba que os solicitantes perderan a motivación de levar a cabo esta mellora e acción de mantemento nos ríos.

Con este decreto, autorizado no Consello da Xunta desta semana, xa son 5 os regulamentos desenvolvidos polo Goberno actual, dos 6 previstos na Lei de Augas de Galicia, os cales conforman unha sólida lexislación para unha mellor xestión da auga na comunidade. Este último regulamento, aprobado a través dun decreto que será de aplicación en 20 días aproximadamente, persegue o establecemento duns procedementos para a aprobación dos instrumentos de planificación que desenvolve Augas de Galicia.

Normativa pioneira
Coa nova normativa, a Xunta de Galicia sitúase como a primeira administración con competencia hidráulica na Comunidade, e a segunda no conxunto de España (a primeira en adoptar esta medida foi a Confederación do Ebro), que activa este proceso.

As actuacións susceptibles a encaixar neste procedemento simplificado son a retirada de árbores mortas e podas que impidan os accesos á canle ou á servidume de paso e a eliminación de materiais de arrastre que obstrúan o leito, así como tarefas de roza sempre que non supoñan un risco de afección ao río ou impliquen a corta de árbores.

Augas de Galicia, a pesar da axilización dos trámites, reserva a potestade de velar polo respecto ambiental destas actuacións e realizará labores de inspección para comprobar a correcta execución dos traballos.

Dende a Xunta sinalan que nos últimos dous anos tan só un expediente foi resolto desfavorablemente, xa que as actuacións solicitadas son razoables e beneficiosas para a conservación dos ríos, que evitan os asolagamentos cando se producen episodios de crecidas.

Cómpre destacar que na actualidade o 55% dos expedientes de autorización destas actuacións corresponden a entidades locais, mentres que o resto a particulares. Neste sentido, os beneficiarios desta medida non só son as administracións locais e os interesados, senón tamén todos os cidadáns, que poderán implicarse de xeito máis simple nas tarefas de mellora ambiental das dúas contornas.

Xestión óptima de actuacións construídas
O citado decreto tamén establece unha vinculación entre a planificación de obras hidráulicas en toda Galicia e a execución das mesmas por parte da Xunta, garantindo unha correcta xestión das actuacións xa construídas.

O Goberno galego avaliará a xestión e o mantemento das obras hidráulicas que leva executado nos últimos 5 anos e o resultado desta avaliación afectará a colaboracións futuras da Xunta con estes xestores. Así, preténdese premiar a boa xestión das infraestruturas de auga na comunidade.

Medidas extraordinarias en casos de seca
Neste decreto tamén se contempla que no caso de producirse episodios extremos como a seca, habilítase ao Consello da Xunta a adoptar medidas extraordinarias para mitigar os efectos destes procesos.

Con este punto preténdese mellorar de xeito efectivo a resposta do Goberno galego ante estas situacións excepcionais que afectan aos galegos, especialmente nas zonas rurais.