Alfonso Rueda critica que o resto de partidos non recoñeza que queren reeditar o bipartito pero multiplicado por catro

Así, salientou que a alternativa ao PP é un todos contra Feijóo, e convidou a pensar en que pode supoñer un goberno de ata catro ou ata cinco partidos que se levan aínda peor do que se levaba o bipartito. Por iso animou a que o domingo non quede ninguén na casa, porque o reto da terceira maioría absoluta é algo excepcional e cada voto será importante. Recordou que as enquisas non dan gobernos, e o importante son os votos nas urnas.

Foi durante o mitin que hoxe se celebrou en Tomiño, no que o presidente provincial estivo acompañado polo conselleiro de Sanidade e candidato, Jesús Vázquez Almuíña, e e polo presidente da xestora do PP local, Esteban González Miranda. Alfonso Rueda criticou que non teñan outra guía nin outro programa máis que botar a Feijóo. Nesta liña, incidiu en que un partido serio, que ten aspiracións de goberno, non pode ofrecer como única proposta de futuro acabar co goberno dos populares.

A pesar de non haber nada enfronte, recordou, pódese perder un goberno que dá estabilidade por uns poucos votos, e sinalou que en España parece que se non se gaña por maioría absoluta non se pode gobernar.

Alfonso Rueda recordou que hoxe en Galicia está baixando o paro, e é a segunda comunidade onde máis baixa, con 32 meses consecutivos, pero tamén que é unha das dúas comunidades onde hai máis investimento público para facer obras que crean emprego, e onde máis industrias, de fóra e potentes, invisten.

Ademais, incidiu en que nestes anos gobernouse con 2.000 millóns de euros menos que cando estaba o bipartito, e aínda así se mantivo o fundamental, aumentaron as prazas de gardería, as axudas á dependencia, se eliminaron os impostos de sucesións, e xa non se paga cando se herda unha finca ou cando se quere permutar unha terra, as empresas elixen Galicia para asentarse e a sanidade pública galega é unha das mellores de España e, polo tanto, do mundo.