COGAMI REALIZOU 2.344 ENTREVISTAS DE ORIENTACIÓN A PERSOAS CON DISCAPACIDADE OU INCAPACIDADE LABORAL DURANTE 2014

O Servizo de Intermediación Laboral (SIL) que forma parte de COGAMI (Confederación Galega de Persoas con Discapacidade) atendeu durante o ano 2014 a un total de 2.344 persoas, todas elas con discapacidade ou con incapacidade laboral recoñecida para a profesión habitual.

Este servizo, que naceu en 1996 ligado ao Servizo Público de Emprego de Galicia e que  financia a Consellería de Traballo e Benestar e o Fondo Social Europeo e cofinancia COGAMI a través de fondos que recibe doutro tipo de financeiros particulares como fundacións, entidades privadas, etc, informa, orienta e asesora ás persoas no proceso da súa busca de emprego. Para isto conta cun equipo formado por 25 orientadoras/es laborais situados nas sete cidades galegas e que, para facer máis accesible o servizo a todas as persoas, este equipo se despraza periodicamente ata as zonas rurais.

A continuación, extraemos os datos de orientación segundo a oficina.

As persoas que se achegan a COGAMI a través do SIL solicitan tanto emprego como formación. O Servizo de Intermediación Laboral apoia a esta persoa na busca de calquera destes servizos, se ben se lle fai unha primeira entrevista de toma de contacto e de coñecemento das súas necesidades e intereses  para poder trazar un itinerario adecuado. A través desta entrevista, a persoa usuaria, sempre posuidora dun certificado de discapacidade recoñecida pola Xunta ou de incapacidade laboral expedido polo Instituto Nacional da Seguridade Social, entra a formar parte dunha base de datos que actualmente conta con 27.500 persoas inscritas, o 61% homes e o 39% mulleres.

O orientador laboral vai ser quen se encargue de informarlle á persoa usuaria sobre as ofertas de emprego que hai, se lle informa sobre os recursos existentes para a busca de ofertas de traballo, dos cursos de formación que inician (en 2014 COGAMI impartiu 50 cursos de Formación Profesional Ocupacional presenciais e a distancia, nos que participaron 673 persoas, das que 339 realizaron prácticas en empresas), e tamén se lle asesora na actualización do curriculum. Sempre a finalidade deste servizo é  implicar á persoa no proceso de busca de emprego.

Outro dos obxectivos do servizo de emprego de COGAMI é a de visitar a empresas, tanto para dar a coñecer o servizo, como tamén, para sensibilizar e concienciar ao empresariado sobre a contratación de persoal laboral con discapacidade. Cando chega unha oferta ao SIL por parte dunha empresa, o servizo de emprego de COGAMI comprométese a seleccionar gratuitamente a dous ou dúas candidatas para o posto en 48 horas, ademais de asesorar ao empresariado sobre as axudas existentes para as adaptacións dos postos de traballo, así como ofrecerlle información sobre as deducións fiscais e incentivos pola contratación de persoas con discapacidade.

Durante o ano pasado, o SIL realizou xornadas de difusión  e concienciación na Confederación de Empresarios de A Coruña e tamén na Cámara de Comercio de Pontevedra, tendo previsto continuar con estas xornadas durante o ano 2015 noutras entidades empresariais de referencia na nosa comunidade.