Converter O Rosal nun referente na música, o seguinte obxectivo do Concello e a Agrupación Musical

O Concello do Rosal prosegue a rolda de contactos coas asociacións ao abeiro do programa "A veciñanza conta". A alcaldesa, Ánxela Fernández Callís, acompañada dos concelleiros de Cultura e de Participación Veciñal, Carlos Villanueva e Ramón Fernández Leal, mantiveron un encontro coa directiva da Agrupación Musical do Rosal no que analizaron os dous últimos anos de actividade, coa crise sanitaria en pleno auxe.

“O balance non pode ser máis positivo. Durante a pandemia Agrupación e Concello traballamos man a man non só para que a Escola de Música continuara coa súa actividade ou levar a cultura aos barrios, senón que fomos quen de adaptarnos ás circunstancias e mesmo xerar novas iniciativas”, lembrou a rexedora. Neste sentido, o concello reconverteu a planta baixa do auditorio municipal nun escenario de máis de 12 metros cadrados para que a agrupación puidera continuar coa súa actividade priorizando a saúde.

Outro exemplo de adaptación e superación é a creación de novos formatos como o festival O Rosal Cámara Fest, un novo xeito de entender a música e dos espazos nos que se desfruta. A alcaldesa recalcou que o obxectivo é que o festival se converta nun referente a nivel musical e poña en valor a calidade de música do municipio. “Queremos que O Rosal sexa un lugar ao que a veciñanza e a xente de fóra se achegue para gozar de música de calidade que temos no noso municipio en espazos innovadores”,  indicou Fernández Callís.

Concello e Agrupación Musical do Rosal abordaron tamén nesta reunión o camiño para continuar medrando e que, nun futuro próximo, a agrupación poida participar en certames de entidade internacional. A rexedora quixo dar os parabéns a Agrupación por todo o traballo desenvolvido, a súa capacidade de resiliencia, o éxito das actividades que están a desenvolver e a calidade formativa e musical que está a xerar a través da Escola de Música.

Por outra banda, a Agrupación Musical do Rosal tamén amosou a súa disposición a participar en vindeiras datas no proceso participativo que o Concello porá en marcha ao abeiro da Axenda 2030, coa que se abordarán os retos sociais, ambientais, económicos, culturais ou educativos para un desenvolvemento urbano sostible.