CORES TOURÍS COMPROBOU O REMATE DAS OBRAS DE MELLORA DO CPI MANUEL SUÁREZ MARQUIER EN O ROSAL

Durante a visita, o responsable territorial e o alcalde analizaron as necesidades deste centro en compaña do xefe territorial de Cultura e Educación, César Pérez Ares.

As obras consistiron na reforma integral da instalación da lumínica. En concreto, retiráronse as antigas luminarias e substituíronse por novos equipos máis eficientes, instaláronse sensores lumínicos nas aulas e repartíronse as cargas eléctricas das luminarias. "Grazas a esta mellora poderase non so conseguir un aforro enerxético das instalacións, senon tamén alcanzar os valores lumínicos no plano de traballo esixidos pola normativa europea" explicou o delegado territorial.

"Estes traballos supuxeron un investimento de 42.317 euros e atopábanse como prioritarias dentro dos proxectos a executar pola Xefatura Territorial de Cultura e Educación", matizou o responsable da Xunta en Pontevedra, aos que hai que engadir outros 40.000 euros aportados polo concello para o remate da substitución dos falsos teitos en vinte aulas e nos corredores. "En total investíronse máis de 80.000 euros", engadiu o delegado territorial.

Ademais destas obras, a Xefatura Territorial de Cultura e Educación leva acometidas outras melloras neste centro como son a reforma dos falsos teitos, da calefacción, da auga quente ou a reparación dos servizos, "esta última contando cun presuposto de case 44.000 euros", explicou o delegado territorial.

Cores Tourís destacou así mesmo que nos últimos anos lévanse realizado diversas obras de mellora e reforma nos centros de O Rosal, como a ampliación do CRA María Zambrano, que contou cun orzamento de case 140.000 euros. "Lévase destinados máis de medio millón de euros por parte da administración autonómica, trátase un investimento moi importante para a adecuación e benestar dos centros do concello de O Rosal", engadiu o delegado territorial.

A Xunta de Galicia está a realizar un importante esforzo no presente ano na mellora dos centros educativos da provincia de Pontevedra. "En total lévanse invertido máis de un millón e medio de euros no acondicionamento e reforma dos centros de Primaria e case 700.000 euros nos de Secundaria, sumando en total un investimento de máis de dous millóns douscentos mil euros nos centros educativos da provincia", sinalou Cores Tourís.

Finalmente o delegado territorial destacou a colaboración por parte da Deputación de Pontevedra no eido da educación, "esperamos seguir contando coa súa colaboración e que a nova corporación se implique tanto como a do anterior presidente, Rafael Louzán. Desexamos que a nova presidenta, Carmela Silva, siga a colaborar coa Xunta de Galicia e cos concellos na mellora dos centros educativos", engadiu.